ატომური ენერგიის საერთაშორისო სააგენტოსა და ჩერნობილის ატომურ ელექტროსადგურს შორის პირდაპირი კომუნიკაცია აღდგა, - ამის შესახებ ატომური ენერგიის საერთაშორისო სააგენტოს გენერალური დირექტორის, რაფაელ მარიანო გროსის განცხადებაშია აღნიშნული.

”აშკარად არ იყო მდგრადი ვითარება და ძალიან კარგი ამბავია, რომ მარეგულირებელს ახლა შეუძლია უშუალოდ დაუკავშირდეს ელექტროსადგურს მაშინ, როცა ეს საჭიროა,” - თქვა გროსიმ განცხადებაში.

რუსული ძალები ჩერნობილს ხუთი კვირის განმავლობაში აკონტროლებდნენ. მათ ელექტროსადგური 31 მარტს დატოვეს. ატომური ენერგიის საერთაშორისო სააგენტომ ატომურ ელექტროსადგურთან კავშირი 10 მარტს დაკარგა.