თსუ-ის ანდრია რაზმაძის სახელობის მათემატიკის ინსტიტუტი კუთვნილ შენობაში დაბრუნდა

საქართველოს განათლებისა და მეცნიერების მინისტრის მიხეილ ჩხენკელის გადაწყვეტილებით, თსუ-ის ანდრია რაზმაძის სახელობის მათემატიკის ინსტიტუტი ისტორიულ შენობაში დაბრუნდა.

როგორც სამინისტროს მიერ გავრცელებულ ინფორმაციაშია ნათქვამი, მინისტრი ინსტიტუტს ეწვია და მეცნიერ-თანამშრომლებს კუთვნილ შენობაში დაბრუნება პირადად მიულოცა.

„დღეს პირადად ჩემთვის ძალიან ემოციური დღეა, რომელსაც დიდი ხანია ველოდით – ჩვენი მათემატიკის ინსტიტუტი დაუბრუნდა თავის მშობლიურ შენობას იქ, სადაც აკადემიკოსმა ნიკო მუსხელიშვილმა დააფუძნა ეს გამორჩეული სამეცნიერო-კვლევითი ინსტიტუტი. ეს მართლაც განსაკუთრებით გამორჩეული სამეცნიერო-კვლევითი დაწესებულებაა, რომელმაც საქართველოს სახელი გაუთქვა მსოფლიო მასშტაბით. ამის დასტურია აქ გამოცემული მაღალი რანგის სამეცნიერო-კვლევითი ჟურნალი, რომელმაც საერთაშორისო აღიარება მოუტანა არამხოლოდ თქვენს ინსტიტუტს, არამედ მთლიანად ქართულ სამეცნიერო საზოგადოებას. წინა ხელისუფლების დროს თქვენ გამოგასახლეს კუთვნილი ისტორიული შენობიდან, რაც იყო აბსოლუტურად უკანონო და უსამართლო აქტი. მოხარული ვარ, რომ დღეს სამართლიანობა აღდგა და დაუბრუნდით თქვენს კერას. გილოცავთ ყველას, მთელი გულით მინდა წარმატებები გისურვოთ. პირადად მე და ჩემი გუნდი მუდამ თქვენს გვერდით ვიდგებით და მხარს დაგიჭერთ ახალი ინიციატივების განხორციელებაში. მჯერა, ღირსეულად გაგრძელდება ამ უნიკალური მათემატიკური სკოლის ტრადიცია, რომლის სათავეებში ჩვენი კორიფეები იდგნენ,“- განაცხადა მიხეილ ჩხენკელმა.

ცნობისთვის, ანდრია რაზმაძის სახელობის მათემატიკის ინსტიტუტი 1935 წელს ნიკო მუსხელიშვილისა და მისი უახლოესი კოლეგების ვიქტორ კუპრაძისა და ილია ვეკუას ინიციატივით დაარსდა, სადაც გასული საუკუნის ორმოციან წლებში ჩამოყალიბდა მსოფლიოში აღიარებული ქართული მათემატიკური სკოლა. დიდი ტრადიციების მქონე ინსტიტუტი დღემდე რჩება მაღალრეიტინგულ სამეცნიერო-კვლევით დაწესებულებად. ანდრია რაზმაძის სახელობის მათემატიკის ინსტიტუტი აწარმოებს ფუნდამენტურ კვლევებს მათემატიკაში, მექანიკასა და თეორიულ ფიზიკაში. ამჟამად ინსტიტუტში 9 სამეცნიერო განყოფილებაა: ალგებრის, მათემატიკური ლოგიკის, გეომეტრია-ტოპოლოგიის, მათემატიკური ანალიზის, დიფერენციალური განტოლებების, მათემატიკური ფიზიკის, დრეკადობის მათემატიკური თეორიის, თეორიული ფიზიკის და ალბათობის თეორიისა და მათემატიკური სტატისტიკის. ანდრია რაზმაძის სახელობის მათემატიკის ინსტიტუტს აქვს სამეცნიერო ბიბლიოთეკა, რომლის საშუალებითაც ინსტიტუტი სამეცნიერო ჟურნალების გაცვლას აწარმოებს უცხოეთის 50-მდე სამეცნიერო დაწესებულებასთან. ინსტიტუტის თანამშრომლებს მჭიდრო სამეცნიერო კონტაქტები აქვთ აშშ-ის, იაპონიისა და დასავლეთ ევროპის 30-ზე მეტ სამეცნიერო ცენტრთან, რაც გულისხმობს ერთობლივი სამეცნიერო პუბლიკაციების გამოქვეყნებას, სამეცნიერო ვიზიტებს, ერთობლივი კონფერენციების მოწყობასა და ა. შ.

ეკატერინე ციმაკურიძე - როცა ტელევიზიის ხელმძღვანელს ასამართლებენ სრულიად არადამაჯერებელი მართლმსაჯულებით, ეს ნამდვილად არაა დასავლური მისწრაფება, ხელისუფლება კი ამბობს, რომ აქვს ევროატლანტიკური კურსი, მაგრამ საქმით სხვა რამეს ამტკიცებს
ქართული პრესის მიმოხილვა 16.05.2022
მუსიკათერაპია, როგორც ბედნიერების ტრენინგი
კომპანია „სმარტ ბუღალტერია“ - უნივერსალური და მაღალკვალიფიციური მომსახურება საბუღალტრო, ფინანსურ და საგადასახადო სფეროში
სამართლებრივი ინტერესების დაცვა ადგილობრივ და საერთაშორისო დონეზე
იშოპინგე „კარფურის“ აპლიკაციაში და მიიღე შანსი მოიგო უამრავი პრიზი
ექსკლუზიური ბრენდები და სასიამოვნო გარემო - ქავთარაძის „სითი მოლის“ პრემიუმ სივრცეში მაღაზია „სენსი“ გაიხსნა
კავკასიაში პირველი ციფრული ლოგისტიკის მენეჯმენტის ერთობლივი სამაგისტრო პროგრამა - კავკასიის უნივერსიტეტისა და TH Wildau-ის პარტნიორობის პერსპექტივები
"ლიბერთიმ" -,,გაზარდე შენი ბიზნესი“ კამპანიის ფარგლებში აგრო და ბიზნესის წარმომადგენლებთან შეხვედრები დაიწყო