“გირჩის” წევრის ალექსანდრე რაქვიაშვილის განცხადებით, არსებული ვითარებიდან გამომდინარე ტერიტორიების დაბრუნების თაობაზე მიხეილ სააკაშვილის განცხადება სპეკულირებაა, რადგან აღნიშნულ საკითხზე მსჯელობაც კი არ დაწყებულა.
როგორც რაქვიაშვილმა აღნიშნა, ამ საკითხზე მხოლოდ განცხადებით არაფერი შეიცვლება და დისკუსიის გამართვაა საჭირო.
“ნამდვილად ისტორიული მომენტია. ომი, რომელიც უკრაინაში მიმდინარეობს, გარდაუვლად შეცვლის მთელ საერთაშორისო ურთიერთობებს. იმედი მაქვს, რუსეთი მალე დამარცხდება და ეს ბევრ შესაძლებლობა გააჩენს მსოფლიოში. მაგრამ ამ კონკრეტულ ვითარებაში ეს არის სპეკულირება, რადგან არც კი დაგვიწყია მსჯელობა, რა უნდა მოვიმოქმედოთ, თუნდაც აფხაზეთთან მიმართებით - რას ვთავაზობთ აფხაზებს, როგორი პოლიტიკა გვექნება. დისკუსიაა საჭირო. სანამ დისკუსია არ გაიხსნება, არაფერი შეიცვლება. ასე რომ, თუ სააკაშვილს ეს პრობლემა აღელვებს, პირველი ნაბიჯი უნდა იყოს ღია დისკუსია, რომ დავინახოთ, რა პოზიციებია, თორემ თავისთავად ამის განცხადებით არაფერი შეიცვლება”,- განაცხადა ალექსანდრე რაქვიაშვილმა.
ცნობისთვის, საქართველოს მესამე პრეზიდენტის მიხეილ სააკაშვილის განცხადებით, “ამ ძალიან რთულ პერიოდში არის ისტორიული შანსი და ფანჯარა საქართველოს ტერიტორიული მთლიანობის აღდგენის”.