ფრაქცია „ქართული ოცნება-დემოკრატიული საქართველო“ უკრაინაში გადაუდებელი საჭიროების მედიკამენტებს აგზავნის

თბილისის საკრებულოს ფრაქციის „ქართული ოცნება-დემოკრატიული საქართველო“ ინიციატივით უკრაინელი ხალხის დასახმარებლად აქცია გაიმართა. ამის შესახებ ინფორმაციას თბილისის საკრებულო ავრცელებს.

მათივე ინფორმაციით, ღონისძიების ფარგლებში, ფრაქციის წევრების, საკრებულოს აპარატის თანამშრომლებისა და კერძო კომპანიების შემოწირული თანხით 19 სახეობის გადაუდებელი, პირველადი საჭიროების მედიკამენტი შეიძინეს. აღნიშნული მედიკამენტების სია საქართველოს წითელი ჯვრის საზოგადოებას უკრაინის წითელმა ჯვარმა მიაწოდა და პირველადი დახმარების მედიკამენტების შერჩევაც სწორედ მოთხოვნის მიხედვით მოხდა.

დედაქალაქის წარმომადგენლობით ორგანოში გამართულ ღონისძიებაზე საკრებულოს თავმჯდომარემ გიორგი ტყემალაძემ აქციაში მონაწილე თითოეულ ადამიანს მადლობა გადაუხადა და უკრაინის მოქალაქეებს თანადგომა კიდევ ერთხელ აღუთქვა.

„უკრაინელი ხალხისადმი ჩვენი მხრიდან დახმარებას და მხარდაჭერას ვაგრძელებთ. დღეს, თბილისის საკრებულოში ფრაქცია „ქართული ოცნების“ ინიციატივით უკრაინელი ხალხის დასახმარებლად აქცია გაიმართა, სადაც ფრაქცია "ქართული ოცნების" წევრების, საკრებულოს თანამშრომლების და რამდენიმე კერძო კომპანიის შემოწირული თანხით შეძენილი პირველადი საჭიროების მედიკამენტები გადავეცით საქართველოს წითელი ჯვრის საზოგადოებას, რომელიც აღნიშნული ტვირთის უკრაინაში ჩატანას უზრუნველყოფს. კიდევ ერთხელ ვუცხადებთ უკრაინელ ხალხს მხარდაჭერასა და თანადგომას“, - განაცხადა გიორგი ტყემალაძემ.

თბილისის საკრებულოსა და საქართველოს წითელი ჯვრის საზოგადოებას შორის უკრაინელი ხალხის დასახმარებლად რამდენიმე დღის წინ გაფორმებული მემორანდუმის თანახმად უკრაინის წითელი ჯვრისთვის პირველადი საჭიროების მედიკამენტების მიწოდებას საქართველოს წითელი ჯვრის საზოგადოება უზრუნველყოფს.

თბილისის საკრებულოს ჯანმრთელობის დაცვის და სოციალურ საკითხთა კომისიის თავმჯდომარის ზურაბ ჩიკვილაძის განცხადებით, უკრაინელი ხალხის დასახმარებლად სოლიდარობისა და დახმარების აქციები თბილისის საკრებულოს მხრიდან უწყვეტ რეჟიმში მიმდინარეობს.

„თბილისის საკრებულოს წარმომადგენლები უწყვეტად ვაგრძელებთ უკრაინელი ხალხის დახმარებას. ცოტა ხნის წინ დავასრულეთ სისხლის დონაცია, დღეს კი, ფრაქცია „ქართული ოცნების“ წევრები, აპარატის თანამშრომლები, ჩვენს მეგობრებთან ერთად, წითელი ჯვრის დახმარებით უკრაინაში ყველაზე საჭირო მედიკამენტებს ვგზავნით“, - განაცხადა ზურაბ ჩიკვილაძემ.

პირველადი საჭიროების მედიკამენტების გაგზავნის აქციაში მონაწილეობა საკრებულოს თავმჯდომარემ გიორგი ტყემალაძემ, ფრაქცია „ქართული ოცნების“ წევრებმა, საკრებულოს აპარატის თანამშრომლებმა, საქართველოს წითელი ჯვრის საზოგადოების პრეზიდენტმა ნათია ლოლაძემ და აქციაში მონაწილე კომპანიების შპს გუმბათი ჰოლდინგი +, შპს ჯსჯ გრუპი და შპს ოცნების სახლის წარმომადგენლებმა მიიღეს.

სტეპან გრიგორიანი - უახლოეს 2-3 თვეში არსებობს იმის შანსი, რომ თურქეთ-სომხეთის საზღვარი მესამე ქვეყნის მოქალაქეებისა და დიპლომატებისთვის გაიხსნას
ქართული პრესის მიმოხილვა 24.06.2024
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
კახა ოქრიაშვილი - საქართველოსთვის ევროკავშირის კანდიდატი ქვეყნის სტატუსი გაყინულია, რაც იმას ნიშნავს, რომ გაყინულია პერსპეტივა ქართველი მასწავლებლის საშუალო ხელფასი 4 500 ლარი გახდეს
კახა ოქრიაშვილი - 2016 წელს 2 მილიონი „ოცნებას“ გადავუხადე თუ პირადად ბატონ ივანიშვილს?