ამერიკის შეერთებული შტატების საგარეო ოპერაციების ასიგნებების ქვეკომიტეტის თავმჯდომარისა და სენატის საგარეო ურთიერთობათა კომიტეტის წევრის, სენატორ კრის კუნსის განცხადებით, ევროკავშირის წევრობისკენ პოზიტიური ნაბიჯების გადასადგმელად საქართველოში რეფორმების გაგრძელებაა საჭირო. ამის შესახებ სენატორმა ჟურნალისტებთან ოპოზიციური პარტიების ლიდერებთან შეხვედრის შემდეგ ისაუბრა და აღნიშნა, რომ პოზიტიური შეხვედრა გაიმართა.

“ჩვენ გვქონდა ძალიან კონსტრუქციული და პოზიტიური შეხვედრა ოპოზიციური პარტიების ფართო წარმომადგენლობასთან. შეერთებული შტატები მტკიცედ უჭერს მხარს დემოკრატიას. დემოკრატია მოიცავს თავისუფალ და სამართლიან არჩევნებს, დამოუკიდებელ სასამართლოს, უსაფრთხოებასა და ძლიერ ეკონომიკას. საქართველოს დამოუკიდებლობის 30 წლის განმავლობაში შეერთებული შტატები მუდმივად ეხმარება საქართველოს ყველა ამ მიმართულებით, იქნება ეს მოსამართლეების გადამზადება, უსაფრთხოების მხარდაჭერა, ეკონომიკის გაძლიერება და ქვეყნის განვითარება. ევროკავშირის წევრობისკენ პოზიტიური ნაბიჯების გადასადგმელად საჭიროა რეფორმების გაგრძელება საქართველოში. ძალიან პოზიტიური და კონსტრუქციული შეხვედრა გვქონდა და ვაფასებთ, რომ დრო დაგვითმეთ და ვაფასებთ მედიის თავისუფლებას”,- განაცხადა სენატორმა კუნსმა.