უკრაინის ვიცე-პრემიერის ირინა ვერეშუკის განცხადებით, მარიუპოლიდან 100 000-მდე ადამიანის ევაკუაცია მხოლოდ გაერო-ს დახმარებით მოხერხდება. ამის შესახებ ინფორმაციას BBC-ი ავრცელებს.

ირინა ვერეშუკმა BBC Radio 4's World Tonight-ს განუცხადა, რომ გაერო უნდა ჩაერთოს ჰუმანიტარული დერეფნების მოწყობაში და განაცხადა, რომ ის იყო ,,ერთადერთი ორგანიზაცია, რომელსაც უნარი და ძალა აქვს სიკვდილის თავიდან ასაცილებლად", მაგრამ ჯერჯერობით ,,მხოლოდ მოვლენებს აკვირდება".

"ლოდინის დრო არ გვაქვს. ეს დერეფნები უახლოეს დღეებში უნდა გაიხსნას", - განაცხადა ვერეშუკმა.

რაც შეეხება ალყაში მოქცეული ქალაქ მარიუპოლის ,,აზოვსტალის" ფოლადის ქარხანას, ვერეშუკმა აღნიშნა, რომ უკრაინელი მებრძოლები ,,არ დანებდებიან, ისინი ბოლომდე იბრძოლებენ და სანამ იქ დარჩებიან, მარიუპოლი უკრაინის ნაწილია".

შეგახსენებთ, გაერო-ს გენერალური მდივანი ანტონიო გუტერეში 26 აპრილს უკრაინის საკითხების შესახებ საქმიანი ვიზიტით მოსკოვს ეწვევა, სადაც ის პრეზიდენტ პუტინსა და საგარეო საქმეთა მინისტრ ლავროვს შეხვდება.