"სამხრეთ ოსეთის" თვითგამოცხადებული რესპუბლიკის ე.წ.უზენაესმა სასამართლომ 28 აპრილს დაგეგმილი "საპრეზიდენტო არჩევნების" მეორე ტურის თარიღი გააუქმა.
"უზენაესმა სასამართლომ დააკმაყოფილა ადმინისტრაციული სარჩელის მოთხოვნები", - განუცხადეს ოსურ საინფორმაციო სააგენტო "რესს" ე.წ.უზენაესი სასამართლოს პრესსამსახურში.
20 აპრილს სამმა მოქალაქემ ე.წ. უზენაეს სასამართლოს სარჩელით მიმართა, რომელშიც უკმაყოფილება გამოთქვეს „სამხრეთ ოსეთის“ ცესკოს მიმართ, რომელმაც არჩევნების მეორე ტური 28 აპრილს დანიშნა.
დღევანდელი "სასამართლო სხდომა" ჟურნალისტების მონაწილეობის გარეშე გაიმართა. "სასამართლოს" გადაწყვეტილებით, ე.წ.ცესკო ვალდებულია კვირას განმეორებითი არჩევნების ახალი თარიღი დანიშნოს. თავის მხრივ, "ცენტრალურ საარჩევნო კომისიაში", განმარტეს, რომ სასამართლოს გადაწყვეტილებას ელოდებიან, სადაც აღნიშნული იქნება თუ რა კრიტერიუმებით, რა აქტების საფუძველზე ავალდებულებს სასამართლო ცესკოს გადაწყვეტილების მიღებას.