კვირას, 24 აპრილს, აშშ-ის თავდაცვის მდივანი, ლოიდ ოსტინი და სახელმწიფო მდივანი, ენტონი ბლინკენი უკრაინას ეწვევიან. ამის შესახებ უკრაინის პრეზიდენტმა, ვოლოდიმირ ზელენსკიმ კიევის მეტროში გამართულ პრესკონფერენციაზე განაცხადა.
"ხვალ ჩვენთან ამერიკის შეერთებული შტატებიდან ხალხი ჩამოდის. აშშ-ის თავდაცვის მდივანსა და სახელმწიფო მდივანთან მექნება შეხვედრა“, - განაცხადა უკრაინის პრეზიდენტმა.
უკრაინის პრეზიდენტი, ვოლოდიმირ ზელენსკი აშშ-ს სახელმწიფო მდივანსა და თავდაცვის მდივანთან კიევში დაგეგმილი შეხვედრის დროს უკრაინისთვის იარაღის მიწოდების და უსაფრთხოების გარანტიასთან დაკავშირებული საკითხების განხილვას გეგმავს. როგორც ზელენსკიმ აღნიშნა, ძალიან მნიშვნელოვანია, რომ აშშ-ის ლიდერები უკრაინაში ჩადიან.
„ახლა შეუძლებელია ჩვენთან ხელცარიელი მოსვლა. ჩვენ ველით არამხოლოდ საჩუქრებს და რაღაც ნამცხვრებს, არამედ კონკრეტულ ნივთებსა და კონკრეტულ იარაღს. მჯერა, რომ შეერთებული შტატებისგან გარკვეული შეთანხმების მიღებას შევძლებთ ან უკრაინის შეიარაღების იმ პაკეტის ნაწილს მივიღებთ, რომელზეც აქამდე შევთანხმდით", - განაცხადა ზელენსკიმ.