პარლამენტის თავმჯდომარემ შალვა პაპუაშვილმა ფრაქცია “ნაციონალური მოძრაობის“ დეპუტატს ნონა მამულაშვილს მიხეილ სააკაშვილისა და რომა შამათავას მონახულების მიზნით საპატიმრო დაწესებულებაში შესვლის უფლება არ მისცა.

შესაბამისი განმარტება პაპუაშვილმა პარლამენტის პლენარულ სხდომაზე გააკეთა. მიზეზად კი, ნონა მამულაშვილის “არაეთიკური ქცევა“ დაასახელა.

სესიაზე მამულაშვილმა შალვა პაპუაშვილს მიმართა, რომ საპატიმრო დაწესებულებაში შესვლაზე “მის მიმართ გართულება“ პარლამენტის ყოფილ თავმჯდომარეს კახა კუჭავას ჰქონდა, რის გამოც მიხეილ სააკაშვილის მონახულება “გაურკვეველი მიზეზით“ სამი თვის განმავლობაში ვერ შესძლო.

“არ ვიცი, თქვენს წინამორბედს მაინცა და მაინც ჩემზე ასეთი გართულება რატომ ჰქონდა. ხვალ მიხეილ სააკაშვილის და რომა შამათავას მონახულება მქონდა დაგეგმილი. ახლა თქვენი აპარატიდან მაცნობეს, რომ შესვლის უფლებას თქვენც არ მაძლევთ. იმედია, რაღაც გაუგებრობას აქვს ადგილი და არანაირ პირად წყენასთან საქმე არ გვაქვს“, - მიმართა ნონა მამულაშვილმა შალვა პაპუაშვილს.

თავის მხრივ, პაპუაშვილმა აღნიშნა, რომ დეპუტატის საპატიმრო დაწესებულებაში სპეციალური ნებართვის გარეშე შესვლა პარლამენტის თავმჯდომარის უფლებამოსილებაა და აქვე დაადასტურა, რომ მან ოპოზიციონერ კოლეგას უარი უთხრა.

“პარლამენტის თავმჯდომარის დისკრეციული უფლებაა, სასჯელაღსრულების დაწესებულებაში შესვლის უფლებამოსილება მოგანიჭოთ. სწორედ აღნიშნეთ, რომ ამ უფლებას ჩემი წინამორბედი არ განიჭებდათ. შემდეგ მე ამ უფლებას გაძლევდით. დღეს ამ უფლებაზე უარი თქვენი არაეთიკური ქცევიდან გამომდინარე გითხარით. წინაზეც ასე იყო, როცა პარლამენტის თავმჯდომარეს და მის კაბინეტს შეურაცხყოფა მიაყენებთ. არაეთიკურ ქცევას არც ახლა მოერიდეთ“, - მიმართა ნონა მამულაშვილს შალვა პაპუაშვილმა.

რამდენიმე დღის წინ ნონა მამულაშვილმა პარლამენტის თავმჯდომარესთან კალათით ოყნა, ბროწეული და პამპერსი მიიტანა და პაპუაშვილისთვის გადასაცემად პარლამენტის თავმჯდომარის კაბინეტის ერთ-ერთ თანამშრომელს დაუტოვა.

ეს მაშინ მოხდა, როცა შალვა პაპუაშვილი უკრაინელმა კოლეგამ ბუჩაში მიიწვია. “ქართული ოცნების“ დეპუტატებმა კი განაცხადეს, რომ პაპუაშვილი ავად იყო.