საქართველოს პროფესიული კავშირების გაერთიანება 28 აპრილს სამუშაო ადგილებზე გარდაცვლილთა და დაშავებულთა საერთაშორისო დღეს საჯარო დისკუსიას გამართავს. ამის შესახებ პროფესიული კავშირების გაერთიანების მიერ გავრცელებულ ინფორმაციაშია ნათქვამი.

მათივე ცნობით, პროფკავშირების ორგანიზებით, გარდაცვლილთა ხსოვნისადმი მიძღვნილ პარაკლისს გადაიხდიან. ამის შემდეგ ღონისძიებაზე პროფკავშირის გაერთიანების თავმჯდომარე და მოადგილეები არსებულ პროგრესსა და გამოწვევებზე ისაუბრებენ და მთავრობისადმი მოწოდებებს გააჟღერებენ.

„მსოფლიოში ყოველწლიურად სამუშაო პროცესებთან დაკავშირებული ტრავმებისგან და პროფესიული დაავადებებისგან 2,6 მილიონი ადამიანი იღუპება. ეს ვითარება ჯერ პანდემიამ, პანდემიის მიწურულს კი მეზობელ ქვეყნებს შორის ომმა კიდევ უფრო დაამძიმა. ვხედავთ, როგორ ზიანდებიან და იღუპებიან მეგობარ უკრაინაში სამხედრო მოსამსახურეები სწორედ პროფესიული მოვალეობის შესრულებისას. სამწუხაროა, ის მძიმე შედეგები, რაც რუსეთ-უკრაინის ომს მოჰყვა.

მიგვაჩნია, რომ პრიორიტეტულ საკითხს ყოველთვის წარმოადგენდა და წარმოადგენს შრომის უსაფრთხოება, რადგან არ არსებობს ადამიანის სიცოცხლესა და ჯანმრთელობაზე უფრო დიდი ღირებულება. ქვეყანაში შრომის უსაფრთხოების მდგომარეობის გასაუმჯობესებლად აუცილებელია: საკანონმდებლო ბაზის დახვეწა და კანონის ეფექტიანი აღსრულება. შრომის უსაფრთხოების მდგომარეობის შესაფასებლად მთავარი ინდიკატორებია საწარმოო შემთხვევებისა და პროფესიული დაავადებების სტატისტიკური მონაცემები. თუმცა, ამ უკანასკნელს სახელმწიფო ამ დრომდე არ აღრიცხავს. მიგვაჩნია, რომ ქვეყანაში შრომის უსაფრთხოების მხრივ არსებული მდგომარეობის გასაუმჯობესებლად და სამუშაო ადგილებზე უბედური შემთხვევების შესამცირებლად, მნიშვნელოვანია სახელმწიფოს მიერ ქმედითი ღონისძიებების გატარება, კერძოდ, საკანონმდებლო ბაზის დახვეწა და კანონის აღსრულების ეფექტური სისტემის შექმნა.

ბოლო წლებში საქართველოში საქართველოს პროფკავშირების გაერთიანების ინიციატივითა და აქტიური ჩართულობით საქართველოში შრომის უსაფრთხოების მდგომარეობის გაუმჯობესების მიზნით მნიშვნელოვანი ნაბიჯები გადაიდგა. ამოქმედდა კანონები ,,შრომის უსაფრთხოების“ და ,,შრომის ინსპექციის“ შესახებ. შრომის ინსპექციის სამსახური ცალკე საჯარო სამართლის იურიდიულ პირად ჩამოყალიბდა გაზრდილი მანდატით, რაც გულისხმობს ეკონომიკის ყველა სექტორში შრომის სტანდარტებზე ზედამხედველობას. შეიქმნა შრომის ინსპექციის სამსახურის საკონსულტაციო ორგანო-მრჩეველთა საბჭო.

დასაქმებულთა ხსოვნის საერთაშორისო დღეს, საქართველოს პროფესიული კავშირების გაერთიანება უერთდება მსოფლიო პროფკავშირების მოთხოვნას, რათა შრომის საერთაშორისო ორგანიზაციამ „შრომის უსაფრთხოება და დასაქმებულთა ჯანმრთელობა სამუშაო ადგილებზე“ აღიაროს ფუნდამენტურ უფლებად, ისევე როგორც: გაერთიანების თავისუფლებისა და კოლექტიური მოლაპარაკებების ეფექტური აღიარების უფლება; იძულებითი ან სავალდებულო შრომის გაუქმება; ბავშვთა შრომის აღმოფხვრა; დისკრიმინაციის აკრძალვა სამუშაო ადგილებზე.

ამასთან, პროფკავშირები ითხოვს მოხდეს შრომის უსაფრთხოების სფეროში მოქმედი შსო-ს კონვენციების რატიფიცირება“,- აღნიშნულია გავრცელებულ ინფორმაციაში.