სამწუხაროდ, ეს არის იმ ტიპის ნაბიჯი, ენერგორესურსების ფაქტობრივად იარაღად გადაქცევა, რომელიც ჩვენ ვიწინასწარმეტყველეთ, რომ რუსეთს შესაძლოა ამ კონფლიქტში განეხორციელებინა, - ამის შესახებ თეთრი სახლის პრესსპიკერმა, ჯენ ფსაკიმ განაცხადა, რითაც რუსეთის მიერ ბულგარეთისა და პოლონეთისთვის გაზის მიწოდების შეწყვეტას გამოეხმაურა.

მისი თქმით, აშშ, ევროპელ პარტნიორებთან მუშაობს იმის გამო, რომ ევროპაში გაზის მიწოდების დივერსიფიცირება მოხდეს.

“სწორედ ამიტომ, რა თქმა უნდა, ჩვენ გვაქვს კონტაქტი ევროპასთან, მათ შორის - ამ ქვეყნებთან - მათ შორის ბოლო 24 საათის განმავლობაში, პოლონეთსა და ბულგარეთის ლიდერებთან. უკვე გარკვეული დროა, თვეებია, ვმუშაობთ ჩვენს პარტნიორებთან მთელ მსოფლიოში, რომ ევროპაში ბუნებრივი აირის მიწოდების დივერსიფიცირება განვახორციელოთ“,- განაცხადა ფსაკიმ.

შეგახსენებთ, რუსეთმა 27 აპრილს ბულგარეთსა და პოლონეთს გაზის მიწოდება შეუწყვიტა იმ მიზეზით, რომ ამ ქვეყნებმა უარი განაცხადეს გაზის საფასურის რუბლში გადახდაზე.