ბეთ ვან შააკი - აშშ-ს აქვს სანდო ცნობები შეკრული ხელებით მოკლული პირების, ქალებისა და გოგონების მიმართ სექსუალური ძალადობის შესახებ - მსოფლიო ხედავს და თქვენ პასუხს აგებთ!
შეერთებულ შტატებს აქვს სანდო ინფორმაცია იმის შესახებ, რომ დონეცკის მახლობლად რუსმა სამხედროებმა სიკვდილით დასაჯეს უკრაინელები, რომლებიც დანებებას ცდილობდნენ, - ამის შესახებ გლობალური სისხლის სამართლის მართლმსაჯულების განსაკუთრებულ დავალებათა ელჩმა ბეთ ვან შააკმა გაერო-ში სიტყვით გამოსვლისას განაცხადა.
„ჩვენ გვაქვს სანდო ინფორმაცია იმის შესახებ, რომ დონეცკის მიდამოებში მოქმედმა რუსულმა სამხედრო ნაწილმა სიკვდილით დასაჯა უკრაინელები, რომლებიც დანებებას ცდილობდნენ“, - განაცხადა ელჩმა.
მისი თქმით, ასეთი საქციელი ომის კანონების ძირითადი პრინციპის დარღვევაა. ელჩმა რუსული ძალების მიერ უკრაინაში ჩადენილი სხვა დანაშაულებების შესახებაც ისაუბრა.
„შეერთებულ შტატებს აქვს სანდო ცნობები შეკრული ხელებით მოკლული პირების შესახებ; ცნობები იმის შესახებ, რომ ცხედრებს წამების ნიშნები აქვთ, ასევე შემზარავი ინფორმაცია ქალებისა და გოგონების მიმართ სექსუალური ძალადობის შესახებ“, - განაცხადა ელჩმა.
მისი თქმით, აღნიშნული დანაშაულებების ჩამდენმა და დამკვეთმა პირებმა პასუხი უნდა აგონ.
„მათ, ვინც ჩაიდინა და გასცა ამ დანაშაულებების ჩადენის ბრძანება, პასუხი უნდა აგონ. ჩვენი მარტივი გზავნილი რუსეთის სამხედრო და პოლიტიკური ხელმძღვანელობისთვის ასეთია: მსოფლიო ხედავს და თქვენ პასუხს აგებთ,“- აღნიშნა ბეთ ვან შააკმა.
