სააკაშვილის ჯანმრთელობა არავის ადარდებს, არც ახლობლებს - ოჯახის წევრებს და ახლობლებს კარგი იქნებოდა ასეთი ძლიერი შთაგონება სააკაშვილზე მაშინ მოეხდინათ, როცა დანაშაულებს სჩადიოდა, - ასე პასუხობს საპარლამენტო უმრავლესობის წევრი გურამ მაჭარაშვილი ჟურნალისტებთან მიხეილ სააკაშვილის ოჯახის მოთხოვნას, რომელიც მის საზღვარგარეთ სამკურნალოდ გადაყვანას ითხოვს, რისთვისაც ხელისუფლებას დროს 30 აპრილის 18 საათამდე აძლევს.
მისივე თქმით, ის, რომ სააკაშვილი ვერ ეგუება ციხეში ყოფნას, ეს მისი და მისი ახლობლების პრობლემაა.
"პატიმარ სააკაშვილის ჯანმრთელობა არ ადარდებს არავის, მათ შორის, არც ახლობლებს, ეს ახსენდებათ მხოლოდ მაშინ, როცა ეს სჭირდება ერთიან მოღალატეობრივ პარტიას. მისი ჯანმრთელობის მდგომარეობა, ისევე როგორც უფლებრივი, უზრუნველყოფილია შესაბამისი უწყებების მხრიდან. აქედან გამომდინარე, ოჯახის წევრებს და ახლობლებს კარგი იქნებოდა ასეთი ძლიერი შთაგონება სააკაშვილზე მაშინ მოეხდინათ, როცა ის სჩადიოდა დანაშაულებს, რისთვისაც ახლა იხდის სასჯელს. საზოგადოებას კარგად ახსოვს ყველაფერი. სამართლებრივი სახელმწიფოს პრინციპი ასეთია - არ უნდა დააშავო, მაგრამ თუ დააშავებ, სასჯელი უნდა მოიხადო,"- განაცხადა მაჭარაშვილმა.