უკრაინის პრეზიდენტმა ვოლოდიმირ ზელენსკიმ უკრაინის შეიარაღებული ძალების სამხედროებსა და გარდაცვლილი გმირების ოჯახის წევრებს ოქროს ვარსკვლავის ორდენები გადასცა. ამის შესახებ ინფორმაციას უკრაინის პრეზიდენტის ადმინისტრაცია ავრცელებს.

მათივე ინფორმაციით, ცერემონია კიევში, მარიინსკის სასახლეში, უკრაინის გმირთა თეთრ დარბაზში გაიმართა.

ვოლოდიმირ ზელენსკის თქმით, აღნიშნულ დარბაზში დააჯილდოვა ისინი, „ვისი წყალობითაც უკრაინა ცოცხლობს".

„ჩვენ ყოველთვის ყველას მადლობელი ვიქნებით, ვინც ამ ომში, რომელსაც რუსეთი აწარმოებს, ჩვენი ქვეყნის გვერდით იდგა. ჩვენ ყოველთვის გავიხსენებთ თითოეულ მათგანს, ვინც უკრაინისა და თითოეული ჩვენგანისთვის სიცოცხლე გაწირა. რუსეთი იმედოვნებდა, რომ ჩვენ ხუთ დღესაც ვერ გავუძლებდით, მაგრამ იმ გმირების წყალობით, რომლებიც დღეს აქ არიან ჩვენ შორის, ჩვენი ერთიანობისა და თავისუფალი ცხოვრების სურვილის წყალობით, ჩვენ ვიბრძვით. ამ დარბაზში, სადაც სახელმწიფოს უმაღლეს სტუმრებს შევხვდით, ჩვენი გმირების მიმართ უდიდეს პატივისცემას გამოვხატავთ. უკრაინის გმირთა ამ თეთრ დარბაზში ვაჯილდოებთ მათ, ვისი წყალობითაც უკრაინა ცოცხლობს", - განაცხადა ზელენსკიმ.