საქართველოს პრემიერ-მინისტრი ირაკლი ღარიბაშვილი ევროკავშირის კითხვარის პირველ ნაწილს ევროკავშირის ელჩ კარლ ჰარცელს დღეს გადასცემს.

როგორც პრემიერმა მთავრობის სხდომის დაწყებამდე განაცხადა, ევროკავშირის კითხვარის მეორე ნაწილზე მუშაობა უკვე მიმდინარეობს და 13 მაისამდე მზად იქნება.

„ჩვენ უკვე დავასრულეთ მუშაობა ევროკავშირის კითხვართან დაკავშირებით. პირველი ნაწილი არის მზად და დღეს მე პირადად გადავცემ ევროკავშირის ელჩს, კარლ ჰარცელს შევსებულ დოკუმენტს. მე მინდა მადლობა გადავუხადო ყველას, ვინც ჩართული იყო ამ პროცესში, ეს იყო ძალიან შრომატევადი საქმე და ჩვენ ეს წარმატებულად დავასრულეთ. ახლა მიმდინარეობს მუშაობა მეორე ნაწილზე, რომელიც უფრო ვრცელი დოკუმენტია, დაახლოებით, 2300 კითხვა არის მოცემული და 33 თავისგან შედგება მეორე ნაწილი - ტექნიკური, სექტორული, დარგობრივი მიმართულებით, ამიტომ ამას 13 მაისამდე და უფრო ადრე გადავცემთ ევროკავშირს“, - განაცხადა პრემიერმა.