იუსტიციის სამინისტროს სსიპ დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნულ სააგენტოს ლადო ხელაძე უხელმძღვანელებს.

სააგენტოს ინფორმაციით, მისი დანიშვნის შესახებ ბრძანება ძალაში უკვე შევიდა. ლადო ხელაძე სააგენტოს უფროსის მოვალეობას მიმდინარე წლის მარტიდან ასრულებდა.

„იუსტიციის სამინისტროს სსიპ დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს უფროსის მოვალეობის დაკისრებამდე, ლადო ხელაძე ამავე უწყებაში მოადგილის პოსტს იკავებდა.

სააგენტოს ჩამოყალიბებამდე, ლადო ხელაძის საქმიანობა იუსტიციის სამინისტროს სსიპ დანაშაულის პრევენციის ცენტრს უკავშირდება, სადაც ის 2014 წლიდან, სხვადასხვა მენეჯერულ პოზიციას იკავებდა.

ლადო ხელაძეს აქვს კერძო სექტორში მუშაობის მრავალწლიანი გამოცდილება. ის სხვადასხვა პერიოდში კერძო კომპანიებში იურიდიული საკითხების მიმართულებით მრჩეველი იყო.

მისი შრომითი საქმიანობა, ასევე, მართლმსაჯულების განმახორციელებელ ორგანოსაც უკავშირდება. წლების განმავლობაში, ლადო ხელაძე რუსთავის საქალაქო სასამართლოში, სოხუმის საქალაქო სასამართლოსა და აფხაზეთის უმაღლეს სააპელაციო სასამართლოში მუშაობდა.

ლადო ხელაძე პროფესიით იურისტია. დამთავრებული აქვს კავკასიის აკადემიური ცენტრის იურიდიული ფაკულტეტი და იურისტის მაგისტრთან გათანაბრებულ ხარისხს ფლობს, ასევე, არის Chicago-Kent School of American Law-ის იურიდიული ფაკულტეტის კურსდამთავრებული, საერთაშორისო ბიზნეს სამართლის მიმართულებით და მოპოვებული აქვს მაგისტრის აკადემიური ხარისხი. არის რამდენიმე პუბლიკაციის ავტორი,“ - აღნიშნულია გავრცელებულ ინფორმაციაში.