ევროკომისიამ წევრი ქვეყნების საკონსულო განყოფილებებისთვის რეკომენდაცია გამოსცა, რომელიც რუსეთის მოქალაქეებისთვის ვიზის გაფორმების წესს განმარტავს. ინფორმაცია ევროკომისიის ვებგვერდზეა განთავსებული.

კერძოდ, წესი უკავშირდება ოფიციალური პირებისა და ბიზნესის წარმომადგენლებისთვის ვიზის გაცემის წესს მას შემდეგ, რაც ევროკავშირთან გამარტივებული სავიზო რეჟიმის შესახებ შეთანხმება უკრაინაში რუსეთის აგრესიის გამო, გარკვეულ პირებზე შეწყდა.

ინფორმაციაში აღნიშნულია, რომ ვიზების გაფორმების გამარტივებული პროცედურის დროებითი შეწყვეტა ეხება გარკვეულ პერსონებს, რომლებიც ახლოს არიან რუსეთის რეჟიმთან.

კერძოდ, ამ კატეგორიაში მოხვდნენ პირები, რომლებიც არიან რუსეთის ოფიციალური დელეგაციის წევრები, სახელმწიფო და რეგიონალური მთავრობების და პარლამენტის წევრები, რუსეთის უზენაესი და საკონსტიტუციო სასამართლოს წევრები, რუსეთის დიპლომატიური პასპორტის მფლობელები, ასევე რუსეთის ბიზნესისა და საქმიანი ორგანიზაციების წარმომადგენლები.

ამავე ინფორმაციით, ამ პირებს არ ექნებათ უფლება ჰქონდეთ პრივილეგია ვიზების გაფორმებაზე.

აღნიშნული არ უკავშირდება რუსეთის რიგით მოქალაქეებს, რომლებიც კვლავაც ისარგებლებენ გამარტივებული სავიზო რეჟიმით.