თავდაცვის ინსტიტუციური აღმშენებლობის სკოლამ (DIBS) კონფერენციას უმასპინძლა, რომელიც სასწავლო ინსტიტუტებს შორის გამოცდილების გაზიარებასა და საუკეთესო საერთაშორისო პრაქტიკის გაცნობას ისახავდა მიზნად.

თავდაცვის სამინისტროს ინფორმაციით, „სწავლა და განვითარება: გამოცდილების გაზიარება და საუკეთესო მაგალითები“ თავდაცვის ინსტიტუციური აღმშენებლობის სკოლისა და ნიდერლანდების სამეფოს კლინგენდაელის საერთაშორისო ურთიერთობების ინსტიტუტს შორის 5-წლიანი თანამშრომლობის ფარგლებში გაიმართა.

კონფერენციის დახურვაზე მონაწილეებს საქართველოს თავდაცვის მინისტრის მოადგილემ გრიგოლ გიორგაძემ სიტყვით მიმართა და საჯარო სამსახურისა და კერძო სექტორის ტრენინგ ინსტიტუტებს შორის თანამშრომლობის მნიშვნელობაზე ისაუბრა.

„მონაწილეებს სიტყვით მიმართეს სკოლის დირექტორმა თეა ნიკოლაშვილმა, ნიდერლადების სამეფოს საგანგებო და სრულუფლებიანმა ელჩმა საქართველოში მარია ქრისტინა ვან კოლდამმა, კლინგენდაელის აკადემიის დირექტორმა რონ ტონმა და დიდი ბრიტანეთისა და ჩრდილოეთ ირლანდიის გაერთიანებული სამეფოს საელჩოს წარმომადგენელმა თავდაცვის სტრატეგიულ საკითხებში ქლერ ავისონმა.

ღონისძიება მიზნად ისახავდა საჯარო და კერძო სექტორის ტრენინგ და სასწავლო ინსტიტუტებს შორის თანამშრომლობის გაღრმავებას, წარმატებული პროექტების გაცნობას, საუკეთესო გამოცდილებისა და მაგალითების გაზიარებას. სამუშაო შეხვედრების ფარგლებში მონაწილეებმა დისტანციური სწავლებისა და სხვა კრეატიული, ციფრული და ინოვაციური საშუალებების, სწავლისა და ორგანიზაციის მართვის პროცესებში გამოყენების წახალისების მეთოდებიც განიხილეს“, - ნათქვამია გავრცელებულ ინფორმაციაში.