„გაათავისუფლეთ პუტინისა და ივანიშვილის პატიმარი, ახალი საქართველოს შემქმნელი მიხეილ სააკაშვილი“ - ამ მოთხოვნით „ნაციონალური მოძრაობის” წევრები მხარდამჭერებთან ერთად პრეზიდენტის ადმინისტრაციასთან აქციას მართავენ.

აქციის მონაწილეები სალომე ზურაბიშვილის მისამართით სკანდირებენ: „გამოდი, გამოდი”. ისინი პრეზიდენტს „მოქმედებისკენ მოუწოდებენ” და აცხადებენ, რომ პოლიტიკური დაძაბულობის განმუხტვა ამ ეტაპზე მას შეუძლია.

„ნაციონალური მოძრაობის” წევრის, ბაჩო დოლიძის განცხადებით, მხოლოდ სალომე ზურაბიშვილს აქვს ის ბერკეტი, რომლითაც ქვეყანაში ვითარებას განმუხტავს.

„ჩემთვის უბრალოდ გაუგებარია, რატომ თვლის, რომ სააკაშვილის გათავისუფლებით შესაძლოა, პოლიტიკური სიტუაცია კიდევ უფრო დაიძაბოს, პირიქით, განმუხტავს და პროცესებს პოლიტიკურ ჭრილში ჩასვამს, რაც ყველაზე მეტად გვჭირდება. ჩვენ გვჭირდება, რომ პოლიტიკური პარტიები დაკავებული იყვნენ პოლიტიკური საქმეებით, მაშინ როცა გვაქვს მოცემულობა, რომ გადასარჩენი გვყავს მესამე პრეზიდენტი“, - განაცხადა ბაჩო დოლიძემ.

მანამდე კი, „ნაციონალური მოძრაობის” წევრებმა მხარდამჭერებთან ერთად რუსთავის მე-12 პენიტენციურ დაწესებულებასთან აქცია გამართეს, სადაც მიხეილ სააკაშვილის საზღვარგარეთ ტრანსპორტირების აუცილებლობაზე ისაუბრეს.

პრეზიდენტის ადმინისტრაციასთან აქციის გამო საავტომობილო გზა გადაკეტილია.