მე რამდენადაც ვიცი, პატიმრობამისჯილი პირის მიმართ თავდებობასთან დაკავშირებით იურიდიული შესაძლებლობა არ არსებობს, - ამის შესახებ სახალხო დამცველის მოადგილემ, გიორგი ბურჯანაძემ ჟურნალისტებთან საუბრისას განაცხადა, რითაც „ნაციონალური მოძრაობის“ დეპუტატების მხრიდან ქვეყნის მესამე პრეზიდენტის, მიხეილ სააკაშვილის თავდებობასთან დაკავშირებით ინიციატივას გამოეხმაურა.

„რაც შეეხება თავდებობას, მე რამდენადაც მაქვს ინფორმაცია, ამის შესაძლებლობას ჩვენი კანონმდებლობა არ ითვალისწინებს და მეტ კომენტარს ამასთან დაკავშირებით ვერ გავაკეთებ. მე რამდენადაც ვიცი, მისჯილი პატიმრის მიმართ თავდებობასთან დაკავშირებით იურიდიული შესაძლებლობა არ არსებობს,“ - განაცხადა გიორგი ბურჯანაძემ.

შეგახსენებთ, "ნაციონალურ მოძრაობაში“ აცხადებენ, რომ საკანონმდებლო ორგანოს მიმართავენ და მიხეილ სააკაშვილს თავდებში უდგებიან, თუკი ხელისუფლება სააკაშვილის საზღვარგარეთ გადაყვანას დათანხმდება, მკურნალობის შემდეგ ის საქართველოში დაბრუნდება და სასამართლოს წინაშე წარდგება.