საქართველოს საგარეო საქმეთა მინისტრმა, ილია დარჩიაშვილმა ISIS-ის წინააღმდეგ ბრძოლის გლობალური კოალიციის მინისტერიალის ფარგლებში კვიპროსელ კოლეგასთან იოანის კასოულიდისთან შეხვედრა გამართა. ამის შესახებ ინფორმაციას საქართველოს საგარეო საქმეთა სამინისტრო ავრცელებს.

უწყების ცნობით, შეხვედრაზე მინისტრებმა ხაზი გაუსვეს საქართველოსა და კვიპროსს შორის დიპლომატიური ურთიერთობის 30 წლის იუბილეს და ამ ხნის განმავლობაში ჩამოყალიბებულ მეგობრულ და პარტნიორულ თანამშრომლობას.

საგარეო საქმეთა სამინისტროს ინფორმაციითვე, საქართველოს ევროპული ინტეგრაციის პროცესზე საუბრისას კვიპროსის მხრიდან კიდევ ერთხელ დაფიქსირდა საქართველოს მხარდაჭერა. ამასთან, აღინიშნა საქართველოს ევროპული დღის წესრიგის შეუქცევადობა.

ასევე ხაზი გაესვა ამ მიმართულებით საქართველოს ძალისხმევას, კერძოდ ასოცირების შეთანხმების გაფორმების შემდგომ დღის წესრიგით გათვალისწინებული რეფორმების განხორციელების, ევროკავშირთან პოლიტიკური და საკანონმდებლო დაახლოების, ასევე ქვეყნის ევროინტეგრაციის პროცესისადმი მოსახლეობის მტკიცე მხარდაჭერის თვალსაზრისით.

მინისტრებმა აღნიშნეს, რომ ევროკავშირის მხრიდან საქართველოს და ასოცირებული ტრიოს ქვეყნების ძალისხმევის შემდგომი მხარდაჭერის აუცილებლობა, რომელსაც განსაკუთრებული მნიშვნელობა ენიჭება არსებული რეგიონალური და გლობალური გამოწვევის ფონზე.

რეგიონსა და საქართველოსი არსებული უსაფრთხოების გარემოზე საუბრისას, კვიპროსის მხრიდან ხაზი გაესვა საქართველოს სუვერენიტეტისა და ტერიტორიული მთლიანობის მხარდაჭერას.

მინისტრებმა მაღალი შეფასება მისცეს ქვეყნებს შორის ხალხთაშორის და კულტურის სფეროში არსებულ მჭიდრო და ნაყოფიერ თანამშრომლობას და დაადასტურეს მზადყოფნა ხელი შეუწყონ მათ შემდგომ განმტკიცებას.