ბათუმი-ქობულეთის შემოვლით ცენტრალურ საავტომობილო გზაზე ავტოსაგზაო შემთხვევის შედეგად, ორი ადამიანი დაშავდა. არსებული ინფორმაციით, ერთმანეთს ორი მსუბუქი ავტომობილი შეეჯახა.

დაშავებულთა შორის ხუთი წლის ბავშვია, ისინი ქობულეთისა და ბათუმის კლინიკებში სასწრაფო სამედიცინო დახმარების ბრიგადამ გადაიყვანა.

ექიმების თქმით, ბავშვი გადაუდებელი მედიცინის განყოფილებაშია მოთავსებული და გამოკვლევები უტარდება.

წინასწარი ინფორმაციით, დაშავებულების ჯანმრთელობის მდგომარეობა სტაბილურია.

შემთხვევის ადგილზე, სამაშველო ბრიგადები და სამართალდამცავები იმყოფებოდნენ. ფაქტზე გამოძიება დაიწყო.