შრომის უსაფრთხოების, ჯანმრთელობისა და გარემოს დაცვის ასოციაციის სპეციალისტებმა ჯავახეთის, ლაგოდეხის, ალგეთის, ვაშლოვანისა და ბორჯომ-ხარაგაულის ეროვნული პარკის ადმინისტრაციების თანამშრომლებისთვის ხანძარსაწინააღმდეგო უსაფრთხოების ნორმების ტრენინგები ჩაატარეს. ინფორმაციას ამის შესახებ დაცული ტერიტორიების სააგენტო ავრცელებს.
მათივე ცნობით, აღნიშნულ ტრენინგებს დაცული ტერიტორიების სააგენტოს 12 ტერიტორიული ადმინისტრაციის ყველა თანამშრომელი გაივლის.
„ტრენინგები მოიცავს, როგორც თეორიული ცოდნის გაღრმავებას, ისე პრაქტიკული უნარ-ჩვევების გაძლიერებას, მათ შორის, ხანძრის აღმოჩენის შემთხვევაში მოქმედების წესს, ხანძრის გაჩენის თავიდან აცილებისათვის ზოგად მანევრებს, ევაკუაციის ინსტრუქციებს, ცეცხლმაქრის სწორი გამოყენების ინსტრუქციას და სხვა.
სწავლება პროექტის „დაცული ტერიტორიების სისტემის ფინანსური მდგრადობის გაძლიერება საქართველოში“ ფარგლებში ხორციელდება, რომელსაც კავკასიის ბუნების ფონდი (CNF) გლობალური გარემოსდაცვითი ფონდის (GEF) და გაეროს განვითარების პროგრამის (UNDP) დაფინანსებით ახორციელებს.
გარემოს დაცვისა და სოფლის მეურნეობის სამინისტროს დაცული ტერიტორიების სააგენტოში თანამშრომელთა კვალიფიკაციის ამაღლების, ცოდნისა და შესაძლებლობების გაუმჯობესების მიმართულებით სხვადასხვა ტიპის ღონისძიებები რეგულარულად ტარდება,“ - აღნიშნულია ინფორმაციაში.