ტურიზმის ეროვნული ადმინისტრაციის საკონვენციო და საგამოფენო ბიურომ ესპანეთში, ქალაქ სევილიაში გამართულ ფორუმში „M&I Europe Spring 2022“ მონაწილეობა მიიღო.

ტურიზმის ეროვნული ადმინისტრაციის ცნობით, საკონვენციო და საგამოფენო ბიურო, საქმიანი ტურიზმის სფეროში ევროპაში ერთ-ერთ ყველაზე მასშტაბურ საერთაშორისო ფორუმზე წევრ კომპანიებთან ერთად იყო წარდგენილი.

მათივე ინფორმაციით, M&I Forum ღონისძიებები ევროპის სხვადასხვა ქვეყნებში 15 წელია იმართება და თითოეულ ფორუმს ასზე მეტი დანიშნულების მართვის ორგანიზაცია, სასტუმრო, სხვადასხვა ქვეყნის საკონვენციო ბიურო და ტურიზმის საბჭო ესწრება.

„M&I Europe Spring 2022“-ის მონაწილეებისათვის ტურიზმის ეროვნული ადმინისტრაციის საკონვენციო და საგამოფენო ბიუროს წარმომადგენლებმა საქართველოში საქმიანი ტურიზმის პოტენციალის შესახებ პრეზენტაცია გამართეს.