დეტალურად ვერ მოგაწვდით ინფორმაციას, რა წამლებს აძლევენ, მაგრამ ჩათვალეთ, რომ ოპტიმალური მკურნალობა მიმდინარეობს, - ამის შესახებ საქართველოს მესამე პრეზიდენტის, მიხეილ სააკაშვილის პირადმა ექიმმა, ნიკოლოზ ყიფშიძემ განაცხადა.
მისი თქმით, „ვივამედის“ მთავარ ექიმთან და მკურნალ ექიმებთან შემდეგი შეხვედრა ორშაბათს იგეგმება, სადაც მიხეილ სააკაშვილის ანალიზის პასუხებს განიხილავენ.
„გვქონდა შეხვედრა მთავარ ექიმთან, გვქონდა შეხვედრა ასევე მკურნალ ექიმებთან და რამდენიმე განყოფილების გამგესთან. გავიარეთ მკურნალობის კურსი, როგორ მკურნალობენ ახლა პრეზიდენტს. ასევე დავსახეთ გეგმა შემდეგი ტესტირების, როდის და რა უნდა გაკეთდეს.
დეტალურად ვერ მოგაწვდით ინფორმაციას, თუ რა წამლებს აძლევენ, მაგრამ ჩათვალეთ, რომ ოპტიმალური მკურნალობა მიმდინარეობს. ორშაბათს გვაქვს დაგეგმილი შემდეგი შეხვედრა, სადაც გავივლით ანალიზის პასუხებს და შევხედავთ, როგორ მიდის მკურნალობა“, - განაცხადა ნიკოლოზ ყიფშიძემ.
ნიკოლოზ ყიფშიძის თქმით, ანალიზების აღებას და დიაგნოსტიკის პროცესს 4-5 დღე დასჭირდება.