საქართველოს ინოვაციების და ტექნოლოგიების სააგენტოს, თბილისში იტალიის საელჩოსა და „იტალიის ტექნოლოგიური ინოვაციების ასოციაციის“ (COTEC) ორგანიზებით, იტალიის კვლევებისა და ინოვაციების დღე (Italian Innovation and Research Day) აღინიშნა. ინფორმაციას ინოვაციების და ტექნოლოგიების სააგენტო ავრცელებს.
მათი ცნობით, ღონისძიებაზე გაიმართა დისკუსიები იმ პროგრამების, პროექტებისა და შესაძლებლობების შესახებ, რომლებსაც იტალია ქართველ სტარტაპებს და სტუდენტებს ინოვაციების, ტექნოლოგიების სფეროში სთავაზობს.
„ღონისძიების ფარგლებში დაჯილდოების ცერემონიალიც გაიმართა, რომლის გამარჯვებულებიც იტალიაში გაემგზავრებიან და სამთვიან უფასო სასწავლო ვიზიტს გაივლიან SPICI -ის FabriTech განყოფილებაში და ინტერნაციონალიზაციის დეპარტამენტში. აღნიშნული პროექტი 2018 წელს, ინოვაციების და ტექნოლოგიების სააგენტოსა და იტალიის ტექნოლოგიური ინოვაციების ასოციაციას COTEC - ს შორის გაფორმებული სამოქმედო შეთანხმების ფარგლებში ხორციელდება, რომელიც გულისხმობს ქართველი სტარტაპებისთვის უფასო ,,სასწავლო ვიზიტს იტალიაში“. პროექტი მესამე წელია ხორციელდება და მისი მიზანია, როგორც ინოვაციური ეკოსისტემის განვითარება, ასევე საერთაშორისო გამოცდილების მიღება და გაზიარება“,-აღნიშნულია ინფორმაციაში.