ოპოზიციის გარკვეულ ნაწილს მამალაძის საკითხი იმიტომ აწუხებს, რომ ერთმანეთში ჰქონდათ გაურკვევლობა და "რაზბორკა" სრული ამ სიტყვის მნიშვნელობით, ჩვენგან რა გინდათ?! - ასე პასუხობს საპროცედურო საკითხთა და წესების კომიტეტის თავმჯდომარე ირაკლი ქადაგიშვილი ოპოზიციის კრიტიკას იმასთან დაკავშირებით, რომ ხელისუფლების მიერ მიღებული ამნისტიის შედეგად, ლევან მამალაძე საქართველოში დაბრუნდა.
მისი თქმით, ადამიანები, რომლებიც ახლა ამაზე საუბრობენ, ლევან მამალაძესთან ერთად იყვნენ „მოქალაქეთა კავშირში“, თუმცა, შემდეგ მათ შორის განხეთქილება მოხდა და "დაასისხლიანეს ერთმანეთი".
"ადამიანი 17 წელი იყო თუ 20 წელი გაქცეული, მე მას არც ვიცნობ ნორმალურად და ვინც მას აფასებს, მასთან ერთად რომ იყვნენ, ის ადამიანები არიან, უკეთ იციან ალბათ, რა გარჩევა ჰქონდათ ერთმანეთში. ამნისტია შეეხო იმ დანაშაულებს, რაც ათეული წლის წინ მოხდა და ერთ-ერთი მამალაძესაც შეეხო. ოპოზიცია ამას ამბობს, რადგან ეს იყო ერთი პარტია - "მოქალაქეთა კავშირი"- ჟვანია, სააკაშვილი, მამალაძე, ბურჯანაძე მათ შორის მოხდა განხეთქილება შევარდნაძის მმართველობის ბოლო პერიოდში, დაასისხლიანეს ისე სცემეს ერთმანეთი, ამოიღეთ ეს კადრები. მერე მამალაძეს მიუსაჯეს რაღაც, მაგათ აქვთ ერთმანეთში რაღაც გასარკვევი. ზოგადი ამნისტიის აქტში მოჰყვა ეს ადამიანი და იმიტომ აწუხებს ოპოზიციის გარკვეულ ნაწილს ეს საკითხი, რომ ერთმანეთში ჰქონდათ გაურკვევლობა და "რაზბორკა" სრული ამ სიტყვის მნიშვნელობით, ჩვენგან რა გინდათ?!"- განაცხადა ქადაგიშვილმა.
ცნობისთვის, ქვემო ქართლში პრეზიდენტის ყოფილი რწმუნებული, ლევან მამალაძე საქართველოში დაბრუნდა. ლევან მამალაძეს ქრთამის აღებასა და უკანონო შემოსავლების ლეგალიზაციის ბრალდებით, დაუსწრებლად 17 წლით თავისუფლების აღკვეთა ჰქონდა შეფარდებული, თუმცა “ამნისტიის შესახებ“ პროექტის მეხუთე მუხლის მიხედვით, პირები, რომელთაც დანაშაული 2004 წლის 1-ელ იანვრამდე ჩაიდინეს, სისხლისსამართლებრივი პასუხისმგებლობისა და სასჯელისგან გათავისუფლდნენ.