ბერლინის საერთაშორისო ტურისტული გამოფენის წარმომადგენლები გერმანელ ჟურნალისტებთან და ტურ-ოპერატორებთან ერთად ქვემო ქართლსა და კახეთს ესტუმრნენ

საქართველოს ტურიზმის ეროვნულმა ადმინისტრაციამ ITB Berlin-ის მმართველ პირებს, გერმანული ტურისტული კომპანიებისა და მედიის წარმომადგენლებს უმასპინძლა.

ტურიზმის ეროვნული ადმინისტრაციის ინფორმაციით, ინფო-ტურის მონაწილეებმა ქვემო ქართლში ბოლნისი და ასურეთი დაათვალიერეს. ესტუმრნენ შვაბების ქუჩას, სადაც გერმანული დასახლება იყო.

მათივე ცნობით, ტურის მონაწილეები ქვემო ქართლიდან კახეთში გაემგზავრნენ, სადაც ნეკრესი, ალავერდი, ყვარელი და სხვა ტურისტულად ცნობილი ადგილები დაათვალიერეს, გაეცნენ ადგილობრივი ღვინის დამზადების წესებს, დააგემოვნეს ღვინო. სპეციალურად სტუმრებისთვის გაიმართა კულინარიული მასტერკლასი. ტურის დასრულების შემდეგ გერმანული მედიის წარმომადგენლები საქართველოს ტურისტული პოტენციალის შესახებ სტატიებსა და რეპორტაჟებს მოამზადებენ.

„საქართველოში პირველად ვარ, ძალიან მომეწონა ბუნება, მწვანე მდელოებიდან თოვლით დაფარული მთები მოჩანს, ძალიან მინდა მთებში ვიმოგზაურო, რადგან ახალგაზრდობაში მთამსვლელი ვიყავი. შევამჩნიე, რომ ისეთ დატვირთულ ქალაქში როგორიც თბილისია ხალხი ძალიან მეგობრულია, ყველა ცდილობს დაგეხმაროს. სანამ აქ ჩამოვიდოდი მითხრეს, რომ საქართველო ერთ-ერთი ყველაზე უსაფრთხო ქვეყანაა მსოფლიოში და მე საქართველოში ვიზიტის შემდეგ დავრწმუნდი, რომ ასეა“,- აღნიშნავს გერმანელი ჟურნალისტი მანფრედ რუთნერი.

2023 წელს საქართველო ბერლინის საერთაშორისო ტურისტულ გამოფენაზე მასპინძელი ქვეყნის სტატუსით წარდგება.

ტურიზმის სფეროში ერთ-ერთ ყველაზე მასშტაბურ საერთაშორისო გამოფენასთან თანამშრომლობის შესახებ საქართველოს ეკონომიკისა და მდგრადი განვითარების მინისტრმა ლევან დავითაშვილმა, ITB Berlin-ის გამოფენის დირექტორმა დევიდ რუცმა და ტურიზმის ეროვნული ადმინისტრაციის ხელმძღვანელის მოვალეობის შემსრულებელმა მედეა ჯანიაშვილმა მემორანდუმს მოაწერეს ხელი.

მოეწყო პრეზენტაცია გამოფენის მნიშვნელობის შესახებ. ITB Berlin-ის წარმომადგენლებმა პირველად საზღვარგარეთ, სწორედ საქართველოში გამართეს B2B ფორმატის ღონისძიება, სადაც გერმანელი ტურ-ოპერატორები ქართველ კოლეგებს შეხვდნენ.

პაატა ზაქარეიშვილი - ხელისუფლება თავისი პოლიტიკით საქართველოსა და კავკასიაში  რუსეთის პოზიციებს აძლიერებს
ქართული პრესის მიმოხილვა 02.02.2023
ლევან  შენგელია - საქართველოს შემთხვევაში „სუვერენული დემოკრატია“ საგარეო-პოლიტიკური ორიენტაციის ხასიათსაც ატარებს და ის აშკარად არ არის დასავლეთისკენ მიმართული
Apple-ისთვის პროგრამული ენის შესასწავლად BTU IOS LAB-ში საბავშვო კოდინგის კურსი დასრულდა
ბორუსან კატმა კოლეჯ „სპექტრში“ სასწავლო ცენტრი გახსნა
კახა ოქრიაშვილი NDI-ის კვლევაზე - მოსახლეობის ნახევარი უმუშევარია - აი, ეს არის სიმართლე
ლიბერთი განათლებისთვის - ლიბერთი 2023 წლის ათასწლეულის ინოვაციის კონკურსის ოფიციალური პარტნიორია