მთაწმინდის პარკში „აფხაზეთის დღე“ აღინიშნა

„აფხაზეთის დღესთან“ დაკავშირებით, აფხაზეთის ავტონომიური რესპუბლიკის მთავრობის ორგანიზებით, მთაწმინდის პარკში სხვადასხვა ღონისძიება გაიმართა.

აფხაზეთის ავტონომიური რესპუბლიკის მთავრობის ინფორმაციით, ციფრული მუზეუმის სივრცეში აფხაზეთის კულტურული მემკვიდრეობის შესახებ იმერსიული პროექციის ჩვენება მოეწყო, სადაც წარმოდგენილი იყო აფხაზეთში არსებული კულტურული მემკვიდრეობის ძეგლების უნიკალური ფოტოები.

მათივე ცნობით, პარკის ტერიტორიაზე ფოტოგამოფენა „კადრები აფხაზეთიდან“ გაიმართა, სადაც გამოტანილი იყო საზოგადო მოღვაწეების ილია ჭავჭავაძის, კათოლიკოს-პატრიარქ ილია II-ის, ნინო რამიშვილის, ილიკო სუხიშვილის, გიგა ლორთქიფანიძის, ნოდარ დუმბაძის, მერაბ კოსტავას, ილია ვეკუას, რეზო თაბუკაშვილის, მედეა ჯაფარიძის აფხაზეთში გადაღებული დღემდე უცნობი და უნიკალური კადრები საოჯახო ფოტოალბომებიდან.

„ღონისძიების ფარგლებში გამოფენილი იყო აფხაზეთიდან დევნილი კალიგრაფის ნამუშევრები, ასევე წარმოდგენილი იყო ხელნაწერთა ეროვნული ცენტრის საარქივო და ფოტო მასალა „აფხაზეთი - ხელნაწერ მემკვიდრეობაში“. პარკის ღია სივრცეში აფხაზეთიდან დევნილ მეწარმეთა პროდუქციის გამოფენა-გაყიდვა მოეწყო.

დღის ბოლოს გურამ ყურაშვილის სახელობის აფხაზეთის სახელმწიფო საგუნდო კაპელას, აფხაზეთის სიმღერისა და ცეკვის სახელმწიფო აკადემიურ ანსამბლ „აფხაზეთის“ და აფხაზეთის სიმღერის სახელმწიფო ანსამბლ „შავნაბადას“ მონაწილეობით კონცერტი ჩატარდა.

ღონისძიებას აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, აფხაზეთის უმაღლესი საბჭოს თავმჯდომარე ჯემალ გამახარია, აფხაზეთის მთავრობის თავმჯდომარის მოადგილე ანზორ მარგიანი, საქართველოს საკანონმდებლო და აღმასრულებელი ხელისუფლების, აფხაზეთის მთავრობისა და უმაღლესი საბჭოს, საქართველოში აკრედიტებული დიპლომატიური კორპუსის, საერთაშორისო და არასამთავრობო ორგანიზაციების, კულტურის სფეროს წარმომადგენლები და ვეტერანები ესწრებოდნენ.

23 მაისი, მოციქულ სვიმონ კანანელის ხსენების დღე, სრულიად საქართველოს კათოლიკოს-პატრიარქის ილია II-ის ინიციატივითა და ლოცვა-კურთხევით „აფხაზეთის დღედ“ დადგინდა. 2014 წლიდან აფხაზეთის ავტონომიური რესპუბლიკის მთავრობა, „აფხაზეთობას“ ყოველწლიურად სხვადასხვა თემატური ღონისძიებებით მთელი საქართველოს მასშტაბით აღნიშნავს“, - აღნიშნულია გავრცელებულ ინფორმაციაში.

ფარხად მამედოვი - აზერბაიჯან-სომხეთის მოლაპარაკებები შეიძლება შედგეს თბილისში, მაგრამ იმ შემთხვევაში, თუ ძირითადი მოდერატორი ამერიკა იქნება და არა ევროკავშირი
ქართული პრესის მიმოხილვა 26.01.2023
ჯეიმი ფლაი - უკრაინელებმა მთელი მსოფლიო დაარწმუნეს, რომ მზად არიან დაიცვან თავის ქვეყანა, მიუხედავად საშინელი საფრთხისა, რომლის წინაშეც იდგა უკრაინის ბევრი ოფიციალური პირი და უკრაინელი ხალხი
წიგნი, რომელიც ხელოვნური ინტელექტის მიერ დაიწერა BTU-ში წარადგინეს
SWEFLAND Group ონკოლოგიური დაავადებების მქონე ბავშვებისთვის - ურთიერთშეთანხმების მემორანდუმი სოლიდარობის ფონდთან
IDS ბორჯომსა და საქართველოს სათხილამურო ფედერაციას შორის პარტნიორობის მემორანდუმი გაფორმდა