კლუბ "ხიდი"-ში ქართველების გენოციდის ინტერაქტიური ექსპოზიცია - "ბუჩამდე იყო აფხაზეთი" გაიხსნა.
ორგანიზატორების თქმით, ექსპოზიციის მიზანი 1992-1993 წლებში ქართველების წინააღმდეგ რუსეთის მიერ ჩადენილი გენოციდის აღიარების კამპანიის წამოწყებაა.
„ევროპული საქართველოს“ ერთ-ერთი ლიდერის, გიგა ბოკერიას განცხადებით, რუსეთმა ის ბოროტება, რასაც ახლა უკრაინაში ჩადის, მანამდე აფხაზეთში ჩაიდინა და იმისათვის, რომ ბოროტება ბოლომდე დამარცხდეს, მისი მხილება ყველამ უნდა სცადოს.
„ეს არის ამ ბოროტების მხილება და მე მგონია, რომ მორალურადაც და პრაგმატულადაც ძალიან მნიშვნელოვანია, როცა იგივე მტერი ჩვენს თავისუფლებას და სიცოცხლეს საფრთხეს უქმნის, ჩვენი საზოგადოების შიგნით, ჩვენმა თაობამ და შემდეგმა თაობამაც, ეს ისტორია იცოდეს. ამის გარეშე ჩვენ მომავალი ვერ გვექნება. ყველა ვინც პირდაპირ ჩვენს მტერს ხელს უწყობს, მორალურად ბოლომდე გარიყული უნდა იყოს. ეს არის იარაღი ამ ბოროტების წინააღმდეგ“, - განაცხადა გიგა ბოკერიამ.
ვიზიტორებს კლუბ „ხიდი“-ში ორი დღის განმავლობაში შეეძლებათ, 1992-1993 წლებში აფხაზეთში რუსული აგრესიისა და სისასტიკის შესახებ რეალური ისტორიები მოისმინონ. ასევე, შესაძლებლობა ექნებათ, საზოგადოებისთვის ჯერ კიდევ უცნობი, რეალური ფოტო და ვიდეო-მასალა იხილონ.
ექსპოზიციის ნახვა 25 მაისს, 10:00 საათიდან 22:00 საათამდე, ხოლო 26 მაისს, 12:00 საათიდან 18:00 საათამდე იქნება შესაძლებელი.
ღონისძიების ორგანიზატორები არიან "თავისუფლების ინსტიტუტი", "ტაბულა", "ამომრჩეველთა განათლების საზოგადოება", "ევროპული საქართველო" და "აფხაზთა კრება".