პარლამენტის პლენარულ სხდომაზე, ვიცე-სპიკერმა არჩილ თალაკვაძემ ოპოზიციის წარმომადგენლებს მიმართა კითხვით: თვლიან თუ არა, რომ საქართველო არსებული მოცემულობით, ამ დემოკრატიის პირობებში ამ ხელისუფლებით, ოპოზიციით და რეფორმებით კანდიდატის სტატუსს იმსახურებს.

მან ოპოზიციას მოუწოდა ხელის აწევით დაედასტურებინათ, დღევანდელი მოცემულობით იმსახურებს თუ არა საქართველო ევროკავშირის წევრობის კანდიდატობის სტატუსს, რაზეც ხელი ოპოზიციის მხოლოდ ერთმა წარმომადგენელმა აწია.

როგორც არჩილ თალაკვაძემ განაცხადა, ეს არის პრობლემა და ასეთი ოპოზიცია ჰყავს საქართველოს პარლამენტში.

„ემხრობით თუ არა საქართველოსთვის კანდიდატის სტატუსის მინიჭებას ახლა და დღეს არსებული მოცემულობით, ანუ თქვენ, თქვენს ქვეყანას რაიმე დამატებით პირობას უყენებთ, თუ თვლით ახლავე, რომ საქართველო ამ დემოკრატიის პირობებში ამ ხელისუფლებით, ამ ოპოზიციით, ამ რეფორმებით იმსახურებს კანდიდატის სტატუსს, გთხოვთ, ხელის აწევით დაუჭიროთ მხარი ამ წინადადებას?... ხედავთ მეგობრებო, ეს არის პრობლემა და ასეთი ოპოზიცია ჰყავს საქართველოს პარლამენტს“ , - განაცხადა არჩილ თალაკვაძემ.

სხდომაზე დებატები ევროპულ და ევროატლანტიკურ სტრუქტურებში ინტეგრაციის საკითხთან დაკავშირებით მიმდინარეობს.

შეგახსენებთ, ოპოზიციის ნაწილმა თავიანთი გამოსვლების შემდეგ საპარლამენტო დებატები დატოვეს.