ევროკავშირის მიერ თანადაფინანსებული ჟან მონეს პროექტის ფარგლებში, "ევროპის უნივერსიტეტმა“ ევროპული ღირებულებების პოპულარიზაციისკენ მიმართული სასკოლო ინიციატივების მხარდასაჭერად ქვე-გრანტები გასცა.

უნივერსიტეტის ცნობით, გამოვლინდა სამი გამარჯვებული საჯარო სკოლა საქართველოს სხვადასხვა რეგიონიდან, რომელთა მოსწავლეებმაც შემეცნებითი თუ შემოქმედებითი ხასიათის და მრავალფეროვანი აქტივობებით დატვირთული მინი-პროექტები წარადგინეს.

"ევროპის უნივერსიტეტში“ დღეს გამართულ საზეიმო ღონისძიებაზე დაჯილდოვდნენ ზუგდიდის #9, თელავის #4 და ბორჯომის #1 საჯარო სკოლები.

"ევროპის უნივერსიტეტი“ ჟან მონეს პროექტს ახორციელებს, რომელიც 31 მაისს საზეიმოდ, სპეციალური კონფერენციით დაიხურება. ღონისძიებაში დიპლომატიური კორპუსის და ხელისუფლების წარმომადგენლები მიიღებენ მონაწილეობას.