DRI - ხელისუფლების უმოქმედობა „ალტ-ინფოს“ ძალადობრივ რიტორიკას აძლიერებს

„დემოკრატიის კვლევის ინსტიტუტის“ (DRI) განცხადებით, ხელისუფლების უმოქმედობა „ალტ-ინფოს“ ძალადობრივ რიტორიკას აძლიერებს.

როგორც ორგანიზაციის მიერ გავრცელებულ ინფორმაციაშია ნათქვამი, „დემოკრატიის კვლევის ინსტიტუტი“ კიდევ ერთხელ მიმართავს შინაგან საქმეთა სამინისტროს, საქართველოს პროკურატურას და სახელმწიფო უსაფრთხოების სამსახურს: დაუყოვნებლივ დაიწყონ გამოძიება „კონსერვატიული მოძრაობის/ალტ-ინფოს“ ერთ-ერთი ლიდერის ზურაბ მახარაძის მუქარის შემცველ განცხადებაზე, რომელიც დანაშაულის ნიშნების შემცველია.

„ასევე, მოვუწოდებთ შინაგან საქმეთა სამინისტროს გაატარონ ეფექტიანი პრევენციული ღონისძიებები ძალადობის თავიდან ასაცილებლად; უზრუნველყონ 5 ივლისის ძალადობრივი მოვლენების ყველა ხელმძღვანელი პირების დაკავება. ცნობისთვის, 26 მაისს, ღიად პრორუსული პოლიტიკური დაჯგუფების „კონსერვატიული მოძრაობის/ალტ-ინფოს“ ერთ-ერთმა ლიდერმა ზურაბ მახარაძემ „ალტ-ინფოს” ეთერში სახელმწიფო სტრუქტურებს მოუწოდა, სახელმწიფო უსაფრთხოების ინტერესებიდან გამომდინარე, „თბილისი პრაიდს” არ მისცენ ღონისძიებების ჩატარების შესაძლებლობა. მისი განცხადებით, „პრაიდის” ჩატარების შემთხვევაში, „ალტ-ინფო“ დააორგანიზებს ხალხის გარეთ გამოსვლას, რის გამოც, ექსცესებმა შეიძლება მიიღოს არაკონტროლირებადი სახე – „ბევრად უფრო მძიმე, ვიდრე წინა წელს.”

ლგბტქ+ პირების შეკრებისა და მანიფესტაციისა და თანასწორობის უფლების რეალიზაციის სახელმწიფო საფრთხედ აღქმა, ძირს უთხრის საქართველოს კონსტიტუციით აღიარებული ადამიანის ფუნდამენტური უფლებების დაცვას. მიუხედავად ამისა, დაახლოებით ერთი წლის წინ, 2021 წლის 5 ივლისს, სახელმწიფო სტრუქტურებმა პრორუსულ, ძალადობრივ დაჯგუფებას და მის თანამზრახველებს ძალადობრივი პროცესის მართვის შესაძლებლობა მისცეს და უარი თქვეს მოქალაქეების უფლებების დაცვაზე. 2021 წლის 5 ივლისს ზურაბ მახარაძე, „კონსერვატიული მოძრაობის/ალტ-ინფოს“ სხვა ლიდერებთან ერთად, ხელმძღვანელობდა ჯგუფურ ძალადობას, რის შედეგადაც 53-მდე ჟურნალისტი და მშვიდობიანი მოქალაქე დაშავდა, „ტვ პირველის“ ოპერატორი ლექსო ლაშქარავა კი ჯანმრთელობის მძიმე დაზიანებების შემდეგ, 11 ივლისს გარდაიცვალა. ზურაბ მახარაძე უშუალოდ უწევდა ორგანიზებას საქართველოს პარლამენტის წინ დადგმული საპროტესტო კარვების გატანას და „სირცხვილიასა“ და „თბილისი პრაიდის“ ოფისების დარბევის მიზნით სხვადასხვა ჯგუფების გამოყოფას.

მიუხედავად იმისა, რომ 2022 წლის 4 აპრილის თბილისის საქალაქო სასამართლოს განაჩენით დასტურდება, რომ 5 ივლისის ძალადობა ორგანიზებული იყო, 5 ივლისის ძალადობრივი მოვლენების ორგანიზატორები ამ დრომდე დაუსჯელები არიან. დემოკრატიის კვლევის ინსტიტუტი მიიჩნევს, რომ სახელმწიფო ორგანოების უმოქმედობა მათ ძალადობრივი მოვლენების მდუმარე თანამონაწილედ ხდის და სიძულვილის ჯგუფების ძალადობრივ ქმედებებს ახალისებს“, - ნათქვამია ინფორმაციაში.

დიმიტრი ცქიტიშვილი - სამწუხაროდ, დღეს საქართველო ჩვენი ევროპელი მოკავშირეებისთვის საეჭვო და არასანდო პარტნიორია
ქართული პრესის მიმოხილვა 25.04.2024
ხათუნა ბურკაძე - ევროპისკენ სვლა საქართველოს ისტორიული არჩევანია და მისი მიღწევა ჩვენი კონსტიტუციური ვალია
Mastercard-ის ფინანსური განათლების პროექტის ფარგლებში, სამცხე-ჯავახეთის სახელმწიფო უნივერსიტეტში, ფინანსური კუთხე გაიხსნა
ბერლინის ფილარმონიული ორკესტრის კონცერტებს საქართველოში დენიელ ჰარდინგი უდირიჟორებს
„საქკაბელის“ მიერ წარმოებული სოლარ კაბელის შეძენა უკვე შესაძლებელია
„არქიში“ ერთ დღეში 150 ბინა გაიყიდა