ნუნუ მიცკევიჩმა გამყოფი ხაზის მიმდებარედ აბიტურიენტებთან საინფორმაციო შეხვედრები გამართა

საქართველოს განათლებისა და მეცნიერების მინისტრის მოადგილე ნუნუ მიცკევიჩმა წალენჯიხის მუნიციპალიტეტში გამყოფი ხაზის მიმდებარე სოფლებში მცხოვრებ აბიტურიენტებთან და სასკოლო საზოგადოებასთან საინფორმაციო შეხვედრები გამართა. ინფორმაციას ამის შესახებ განათლებისა და მეცნიერების სამინისტრო ავრცელებს.

მათივე ცნობით, ფახულანის, ლიის, ჭალისა და მუჟავას სკოლის მოსწავლეებს მინისტრის მოადგილემ სიტყვით მიმართა და სტუდენტთა მხარდამჭერი პროგრამების, ერთიანი ეროვნული გამოცდებისა და სამინისტროს მიერ განხორციელებული სხვა მნიშვნელოვანი ინიციატივების შესახებ ინფორმაცია მიაწოდა.

როგორც ნუნუ მიცკევიჩმა აღნიშნა, განათლებისა და მეცნიერების სამინისტროსთვის ახალგაზრდებზე ზრუნვა და მათი ხელშეწყობა უმთავრესი პრიორიტეტია. შესაბამისად, აბიტურიენტებისა და სტუდენტებისთვის, განსაკუთრებით კი გამყოფი ხაზის მიმდებარედ მცხოვრები ახალგაზრდებისთვის სამინისტრო არაერთ მხარდამჭერ პროგრამას ახორციელებს. მათ შორის, სახელმწიფო სასწავლო გრანტით დაფინანსების პროგრამასა და სოციალურ პროგრამას.

„ღონისძიების ფარგლებში შოთა რუსთაველის საქართველოს ეროვნული სამეცნიერო ფონდის გენერალურმა დირექტორმა ჯაბა სამუშიამ მოსწავლეებს მეცნიერების პოპულარიზაციის მიზნით განხორციელებული სამეცნიერო კონკურსების პირობები გააცნო. მათ შორის, ფონდის გენერალურმა დირექტორმა ახალგაზრდებთან მოსწავლე-გამომგონებელთა კონკურსი – „ლეონარდო და ვინჩი“ განიხილა და მათ კონკურსში მონაწილეობისაკენ მოუწოდა.

სიტყვით გამოსვლების შემდეგ შეხვედრა კითხვა-პასუხის რეჟიმში წარიმართა. ადგილობრივი მოსახლეობის კითხვები ძირითადად ერთიანი ეროვნული გამოცდებისთვის მზადებასა და სოციალური პროგრამის ფარგლებში სტუდენტთა დაფინანსებას ეხებოდა.

საინფორმაციო შეხვედრებში მონაწილეობა შერიგებისა და სამოქალაქო თანასწორობის საკითხებში საქართველოს სახელმწიფო მინისტრის მრჩეველმა ლია გიგაურმა, აფხაზეთის ავტონომიური რესპუბლიკის განათლებისა და კულტურის მინისტრის პირველმა მოადგილემ ნინო ლობჟანიძემ, შეფასებისა და გამოცდების ეროვნული ცენტრის სარეგისტრაციო მასალების ანალიზისა და საგამოცდო პროცესების მართვის სამსახურის უფროსმა მაია გაბუნიამ და განათლებისა და მეცნიერების სამინისტროს წარმომადგენლებმაც მიიღეს.

საქართველოს განათლებისა და მეცნიერების სამინისტროს ორგანიზებით ახალგაზრდებთან საინფორმაციო შეხვედრები მომავალშიც სისტემატურად გაიმართება, სადაც აბიტურიენტებს მათთვის საინტერესო საკითხებზე ინფორმაციას სამინისტროსა და სხვადასხვა უწყების წარმომადგენლები მიაწვდიან.

გამყოფი ხაზის მიმდებარე სოფლებში მცხოვრები სტუდენტების სწავლის დაფინანსების პროგრამა 2013 წლიდან მოქმედებს და მისი ბიუჯეტი 5 000 000 ლარს შეადგენს. თანხა 9 სხვადასხვა მუნიციპალიტეტის – გორის, კასპის, ქარელის, ხაშურის, საჩხერის, ონის, დუშეთის, წალენჯიხის და ზუგდიდის გამყოფი ხაზის მიმდებარე სოფლებში მცხოვრები სტუდენტების დაფინანსებისთვის არის განკუთვნილი. აღნიშნული დაფინანსება უმაღლესი განათლების პირველ და მეორე საფეხურზე ჩარიცხულ სტუდენტებზე გაიცემა.

საქართველოს განათლებისა და მეცნიერების სამინისტრო ასევე, სახელმწიფო სასწავლო გრანტით სტუდენტთა დაფინანსების სოციალურ პროგრამას ახორციელებს, რომლის ბიუჯეტი 2 520 000 ლარს შეადგენს. სოციალური პროგრამის ფარგლებში სახელმწიფო სასწავლო გრანტის მოპოვება სოციალურად მოწყვლადი ჯგუფის სტუდენტებს შეუძლიათ. მოპოვებული სახელმწიფო სასწავლო გრანტი სტუდენტზე საგანმანათლებლო პროგრამის ხანგრძლივობის ვადის შესაბამისად გაიცემა“, - აღნიშნულია ინფორმაციაში.

თენგიზ ფხალაძე - დღეს თამაშის დრო ნამდვილად არ არის, 12-ვე ვალდებულება უნდა შესრულდეს და არა შესრულების ილუზია შეიქმნას, კანდიდატობის ვერ მიღება მხოლოდ ჩვენს თავს უნდა დავაბრალოთ და სხვას არავის
ქართული პრესის მიმოხილვა 27.06.2022
უკრაინის დამოუკიდებელი ანტიკორუფციული კომისიის აღმასრულებელი დირექტორი - დრო ჩვენთვის სიცოცხლით იზომება, ჩვენ არც თუ ისე ტოლერანტულები ვართ ლოდინისადმი - ამ დროში ვკარგავთ ქვეყანას, რომელსაც რუსეთი წამებით კლავს
„სილქ როუდ ჯგუფი“ ბიზნესმენ ლევან კაჭარავას გარდაცვალებას ეხმაურება
პირველი კრიპტო POS-ტერმინალი საქართველოშია