ეკონომიკისა და მდგარადი განვითარების სამინისტროს ინფორმაციით, მაისის თვეში ტურისტული ვიზიტები 2019 წლის ანალოგიურ პერიოდთან შედარებით, 62.3%-ით აღდგა.

მინისტრის მოადგილის, მარიამ ქვრივიშვილის შეფასებით, ეს მაჩვენებელი იმის მაგალითია, რომ საქართველოს მთავრობა, ეკონომიკის სამინისტრო და ტურიზმის ადმინისტრაცია ტურიზმის სექტორის აღდგენის სწორი სტრატეგიითა და სამოქმედო გეგმით მუშაობს.

„ჩვენ აქტიურად ვთანამშრომლობთ კერძო სექტორთან, გავააქტიურეთ მუშაობა მიზნობრივ ბაზრებზე და ხელი შევუწყეთ ახალი ავიაკომპანიების შემოსვლას ავიაბაზარზე. შედეგად, მივიღეთ ტურიზმის ზრდის უფრო დაჩქარებული დინამიკა, რაც დადებითად აისახება როგორც ეკონომიკაში შემოსულობებზე, ასევე ახალ სამუშაო ადგილებზე. ამდენად, მოხარული ვართ, რომ საქართველოში ტურიზმის სექტორის აღდგენა დიდი წარმატებით მიმდინარეობს“, - განაცხადა მარიამ ქვრივიშვილმა.

ეკონომიკის სამინისტროს ცნობით, მიმდინარე წლის მაისში საქართველოში 359,238 საერთაშორისო მოგზაურის ვიზიტი განხორციელდა. ზრდამ 2021 წლის მაისის თვესთან შედარებით 228.5%-ი შეადგინა, ხოლო მაისში საერთაშორისო ტურისტული ვიზიტების რაოდენობამ 264,327 შეადგინა, რაც 173.9%-ით მეტია გასული წლის ანალოგიურ პერიოდთან შედარებით, ხოლო 2019 წლის აპრილის თვის მონაცემებთან შედარებით ტურისტული ვიზიტები 62.3%-ითაა აღდგენილი.

უწყების ინფორმაციით, 2022 წლის იანვარ-მაისში საქართველოში 1,180,034 საერთაშორისო მოგზაურის ვიზიტი შედგა, ზრდა 2021 წლის 5 თვის მონაცემებთან შედარებით 257.8%-ია, ხოლო 2019 წლის ანალოგიურ პერიოდთან შედარებით აღდგენამ 39.5% შეადგინა.

2022 წლის 5 თვეში საერთაშორისო ტურისტული ვიზიტების რაოდენობამ 906,670 შეადგინა, რაც 213.8%-ით მეტია გასული წლის ანალოგიურ პერიოდთან შედარებით, ხოლო 2019 წლის მაისის თვის მონაცემებთან შედარებით ტურისტული ვიზიტები 54.8%-ით არის აღდგენილი.