„ნაციონალური მოძრაობა“ ოპოზიციური პარტიების მიერ „ჩახსნილი“ საარჩევნო სიების აღდგენას და ამ თემაზე კონსულტაციების დაწყებას ითხოვს

„ერთიანი ნაციონალური მოძრაობა“ ოპოზიციური პარტიების მიერ „ჩახსნილი“ საარჩევნო სიების აღდგენას და ამ თემაზე კონსულტაციების დაწყებას ითხოვს.

საკითხი დეპუტატმა ლევან ბეჟაშვილმა პარლამენტის საპროცედურო საკითხთა და წესების კომიტეტის სხდომაზე დასვა, სადაც ფრაქცია “ნაციონალური მოძრაობის" წევრის ზაალ უდუმაშვილის განცხადების საფუძველზე, მისთვის სადეპუტატო უფლებამოსილების შეწყვეტის საკითხი განიხილეს და დადებითი გადაწყვეტილება მიიღეს.

შედეგად “ნაციონალური მოძრაობა“ პარლამენტში მეორე მანდატს კარგავს. სულ ოპოზიციის ოთხი საპარლამენტო მანდატი იკარგება (ორი - “ნაციონალური მოძრაობა“, ორი - “ლელო“), რადგან პარლამენტიდან გასულ დეპუტატებს ადგილმონაცვლეები არ ჰყავთ.

როგორც ბეჟაშვილმა აღნიშნა, პარლამენტში მთავარი პროპორციული წარმომადგენლობაა და ოპოზიცია იმ პროპორციით უნდა იყოს წარმოდგენილი, რა პროპორციითაც ის ამომრჩეველმა აირჩია.

“აქტუალურია დეპუტატთა ადგილმონაცვლეების საკითხი. ხომ არ ფიქრობთ უმრავლესობაში ან ხომ არ შეიძლება მივაღწიოთ შეთანხმებას, რომ ადგილმონაცვლეების საკითხი საკანონმდებლო გზით გადავწყვიტოთ. ოპოზიციის მაშინდელი გადაწყვეტილება იმ ვითარებიდან გამომდინარე სხვაგვარი იყო. ახლა აღმოჩნდა, რომ ინიციატივას ჩვენვე ვაყენებთ და ვითხოვთ, რომ ადგილმონაცვლეების საკითხი განსაზღვრული იყოს. ასე შეიძლება იმ ნიშნულამდე მივიდეთ, რითაც დავიწყეთ, ვიდრე პარლამენტში შემოვიდოდით. ამ თემაზე კონსულტაციების დაწყება უპრიანი იქნება - იქნებ ამ თემაზე შეხვედრები გავმართოთ“, - განაცხადა ლევან ბეჟაშვილმა კომიტეტის სხდომაზე.

“ნაციონალური მოძრაობის“ პასუხად კომიტეტის თავმჯდომარემ, ირაკლი ქადაგიშვილმა აღნიშნა, რომ საკითხი პირველი რიგში პოლიტიკურია და მხოლოდ პოლიტიკური შეთანხმების შემდეგ შეიძლება მოიძებნოს სამართლებრივი გადაწყვეტა. ქადაგიშვილმა ამ კონტექსტში პარლამენტის თავმჯდომარის მიერ ოპოზიციისთვის წაყენებული პირობები გაიხსნა.

“პარლამენტის თავმჯდომარის გამოსვლისას ითქვა, მთელ რიგ საკითხებზე პოლიტიკური კონსენსუსი რომ შედგეს, რა პოლიტიკური გზა არის ამისთვის გასავლელი. რაც მალე იქნება ამ პირობებისა და პოლიტიკური კონსენსუსისკენ მისასვლელ გზაზე სვლა, მით ადვილი იქნება მთელ რიგ საკითხებზე საგნობრივი, პოლიტიკური მოლაპარაკებების გამართვა“, - განაცხადა ქადაგიშვილმა ბეჟაშვილის პასუხად.

“ქართული ოცნების“ კიდევ ერთმა დეპუტატმა გურამ მაჭარაშვილმა ბეჟაშვილს მიმართა, ჩამოყალიბდნენ, იმყოფებიან თუ არა არალეგიტიმურ პარლამენტში.

ცნობისთვის, პარლამენტის თავმჯდომარემ შალვა პაპუაშვილმა საპარლამენტო ოპოზიციას, პირველ რიგში კი, “ერთიან ნაციონალურ მოძრაობას“ პლენარულ სხდომაზე რამდენჯერმე შემდეგი დათქმითა და პირობით მიმართა: - უარყავით კონცეფცია, რომლის მიხედვით, “ქართული ოცნება“ რუსული პროექტია და აღიარეთ არჩევნების შედეგები! ... პაპუაშვილმა ხაზგასმით რამდენჯერმე აღნიშნა, რომ მხოლოდ ასეთ შემთხვევაში შეიძლება მოხდეს ოპოზიციასთან თანამშრომლობა და ორმხრივი შეთანხმება.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024