ეკონომიკისა და მდგრადი განვითარების მინისტრის მოადგილე გენადი არველაძე, რომელიც ვაჭრობის მსოფლიო ორგანიზაციის მე-12 მინისტერიალში მონაწილეობს, თურქეთის რესპუბლიკის ვაჭრობის მინისტრის მოადგილე მუსტაფა ტუზჯუს შეხვდა. ინფორმაციას ამის შესახებ ეკონომიკის სამინისტრო ავრცელებს.
უწყების ცნობით, მხარეებმა შეხვედრაზე რეგიონში არსებული რთული გეოპოლიტიკური ვითარება და ამ ფონზე, ორმხრივი სავაჭრო-ეკონომიკური ურთიერთობების შემდგომი გააქტიურების შესაძლებლობები განიხილეს.
აღინიშნა, რომ თურქეთი 15 პროცენტიანი წილით, საქართველოს უმსხვილეს სავაჭრო პარტნიორებს შორის პირველ ადგილზეა. 2022 წლის იანვარი-აპრილის პერიოდში ორმხრივი სავაჭრო ბრუნვა, წინა წლის ანალოგიურ პერიოდთან შედარებით, 28 პროცენტით, საქართველოს ექსპორტი 23 პროცენტით გაიზარდა.
ამასთან, ორმხრივი სავაჭრო ბრუნვის პოზიტიური დინამიკის მიუხედავად, მხარეებმა ხაზი იმ გარემოებას გაუსვეს, რომ ქვეყნებს შორის როგორც ვაჭრობის, ისე ეკონომიკური თანამშრომლობის სხვა მიმართულებით დიდი პოტენციალი არსებობს.
შეხვედრაზე მხარეები შეთანხმდნენ, რომ საქართველოსა და თურქეთის რესპუბლიკას შორის არსებულ თავისუფალი ვაჭრობის შესახებ შეთანხმებაში მომსახურებით ვაჭრობის დამატებაზე მოლაპარაკებები უახლოეს მომავალში წარმატებით დასრულდება.
„თურქეთი საქართველოს უმსხვილესი სავაჭრო პარტნიორია. ჩვენ შევთანხმდით, უახლოეს მომავალში შევძლებთ, ხელი მოვაწეროთ ცვლილებებს თავისუფალი ვაჭრობის შეთანხმებაში, რაც ორი ქვეყნის ბიზნესებს ერთმანეთის ბაზრებზე საკუთარი სერვისების გაყიდვას გაუმარტივებს. ეს ორმხრივ სავაჭრო ბრუნვას გაზრდის და ორივე ქვეყნისათვის თანაბრად მომგებიანი იქნება,“ - განაცხადა საქართველოს დელეგაციის ხელმძღვანელმა.
უწყების ცნობითვე, საქართველოს ეკონომიკისა და მდგრადი განვითარების მინისტრის მოადგილე გენადი არველაძე შვეიცარიის ქალაქ ჟენევაში ვაჭრობის მსოფლიო ორგანიზაციის მე-12 მინისტერიალს ესწრება, რომლის ფარგლებშიც საქართველო მოწინავე ეკონომიკის მქონე ქვეყნების მომსახურებით ვაჭრობის რეგულირების ინიციატივას ოფიციალურად უკვე მიუერთდა. აგრეთვე დაგეგმილია მისი ორმხრივი შეხვედრები სხვადასხვა ქვეყნების სავაჭრო დელეგაციების ხელმძღვანელებთან.