"ევროპის უნივერსიტეტის" ფუტსალის გუნდმა "ფუტსალის ლიგა 2“-ის 2021-2022 წლების სეზონში წარმატებით იასპარეზა. ინფორმაციას ამის შესახებ „ევროპის უნივერსიტეტი“ ავრცელებს.

მათივე ცნობით, ფეხბურთელებმა გულშემატკივარს არაერთი შთამბეჭდავი მატჩი აჩუქეს.

„მათ არაერთი სანახაობრივი თამაში ჩაატარეს და მძიმე დაპირისპირებებში მოწინააღმდეგეები ბევრჯერ დაამარცხეს.

კლუბის წარმატებაში უდიდესი როლი ეუ ფუტსალის გუნდის მეკარე ბაკურ სანიკიძემ და თავდამსხმელმა, "ევროპის უნივერსიტეტის" სტუდენტმა გიორგი ქურხულმა ითამაშეს.

ბაკურ სანიკიძემ და გიორგი ქურხულმა უდიდესი კონკურენციის ფონზე საუკეთესოთა შორის მოხვედრა შეძლეს და "ფუტსალის ლიგა 2“-ის საუკეთესო მეკარედ და თავდამსხმელად დასახელდნენ.

"ევროპის უნივერსიტეტი" ტურნირის ვიცე-ჩემპიონია და შანსს ინარჩუნებს, არსებობის ისტორიაში პირველად უმაღლეს ლიგაში აღზევდეს. გუნდი საკვალიფიკაციო ეტაპზე ქუთაისის "მართვეს“ დაუპირისპირდება. პირველი შეხვედრა 18 ივნისს, თბილისის ოლიმპიურ სასახლეში გაიმართება,“ - აღნიშნულია ინფორმაციაში.