"დიდი სლემის“ ტურნირების 23-გზის გამარჯვებული, სერენა უილიამსი „უიმბლდონის“ წლევანდელ გათამაშებაში იასპარეზებს.
ამის შესახებ მსოფლიოს ყოფილმა პირველმა ჩოგანმა სოციალურ ქსელში განაცხადა.
„SW (სერენა უილიამსი) და SW19 (უიმბლდონის საფოსტო კოდი). ველოდები თქვენთან შეხვედრას 2022 წელს. წავედით“, - დაწერა უილიამსმა „ფეისბუქის“ საკუთარ გვერდზე.
ცნობისთვის, „უიმბლდონი“ 27 ივნისს დაიწყება და 10 ივლისამდე გაგრძელდება.
შეგახსენებთ, რომ ლეგენდარულ ამერიკელ ჩოგბურთელს აღნიშნული ტურნირი შვიდჯერ აქვს მოგებული.
„უიმბლდონზე“ გამოსვლამდე უილიამსი ისტბურნის 500-ქულიან ტურნირზე ითამაშებს, სადაც პირველ შეხვედრაში მისი მეტოქე ტუნისელი ჩოგბურთელი, ონს ჟაბორი იქნება. ისტბურნის ტურნირი 19 ივნისს აიღებს სტარტს.