17 ივნისი გვალვასთან და გაუდაბნოებასთან ბრძოლის მსოფლიო დღეა
გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრში, გვალვასთან და გაუდაბნოებასთან ბრძოლის მსოფლიო დღის ფარგლებში, სერვანტესის სახელობის გიმნაზია აია-ჯესსის სკოლის VII-IX კლასის მოსწავლეებთან საინფორმაციო შეხვედრა გაიმართა. ინფორმაციას ამის შესახებ გარემოსდაცვითი ინფორმაციისა და განათლების ცენტრი ავრცელებს.
მათივე ცნობით, შეხვედრა ცენტრის დირექტორმა, თამარ ალადაშვილმა გახსნა.
„ნიადაგის დაცვა და მისი ნაყოფიერების შენარჩუნება ჩვენი ქვეყნისთვის უმნიშვნელოვანესი საკითხია, რადგან საქართველოში ნიადაგის მდგრადი გამოყენება სოფლის მეურნეობისა და ეკონომიკის განვითარების მთავარი რეზერვი და მდგრად გარემოში ცხოვრების წინაპირობაა. ჩვენი საერთო მიზანია, გარემოს მიმართ გონივრული დამოკიდებულება გამოვხატოთ, საკუთარი ქცევა შევაფასოთ და ის გარემოს სასარგებლოდ შევცვალოთ. გარემოს დაცვის, მისი მდგრადობის შენარჩუნებისა და ბუნებრივი რესურსების რაციონალური მართვის აუცილებლობის შესახებ ახალგაზრდებისთვის ინფორმაციის მიწოდება განსაკუთრებით მნიშვნელოვანია, რაც დაგვეხმარება შევქმნათ საზოგადოება, რომელიც გარემოს მაქსიმალურად მოუფრთხილდება ”, - განაცხადა თამარ ალადაშვილმა.
საინფორმაციო შეხვედრაზე გარემოს დაცვისა და სოფლის მეურნეობის სამინისტროს მიწის რესურსების დაცვის სამმართველოს ხელმძღვანელმა, ნინო ჩიქოვანმა მოსწავლეებს ნიადაგის ფუნქციები და მისი დეგრადაციის გამომწვევი მთავარი ფაქტორები: გადაჭარბებული ძოვება, ტყის ფართობების შემცირება, არასწორი და არამდგრადი სასოფლო-სამეურნეო საქმიანობები, ურბანული განვითარების გზით ტერიტორიების არარაციონალური ათვისება გააცნო. მოსწავლეებმა განსაკუთრებული ინტერესით კახეთის, ქვემო ქართლისა და შიდა ქართლის რეგიონებზე იმსჯელეს, სადაც გაუდაბნოების საფრთხე არსებობს.
17 ივნისი გვალვასთან და გაუდაბნოებასთან ბრძოლის მსოფლიო დღე გაეროს გენერალურმა ასამბლეამ 1994 წელს გამოაცხადა და ყოველწლიურად აღინიშნება, რათა გაუდაბნოებასთან ბრძოლის საერთაშორისო ძალისხმევის შესახებ საზოგადოების ცნობიერების ამაღლებას ხელი შეუწყოს და მოგვიწოდებს მოვუფრთხილდეთ ნიადაგს, როგორც შეზღუდულ და უმნიშვნელოვანეს რესურსს.
