საგამოძიებო სამსახურმა ბათუმში, „ტვ. პირველის“ ოპერატორზე თავდასხმის საქმეზე გამოძიება დაიწყო
ბათუმში „ტვ. პირველის" ოპერატორ მურმან ზოიძეზე თავდასხმის საქმეზე სპეციალური საგამოძიებო სამსახურმა გამოძიება დაიწყო.
სპეციალურმა საგამოძიებო სამსახურმა გამოძიება გადამღები ჯგუფისთვის ჟურნალისტურ საქმიანობაში უკანონოდ ხელის შეშლის ფაქტზე, საქართველოს სისხლის სამართლის კოდექსის 154-ე მუხლის მეორე ნაწილით დაიწყო.
"სპეციალური საგამოძიებო სამსახური ინტენსიურ რეჟიმში ატარებს ყველა საჭირო საგამოძიებო და საპროცესო მოქმედებას ობიექტური და სრულყოფილი გამოძიების უზრუნველყოფის მიზნით",- აღნიშნულია საგამოძიებო სამსახურის ინფორმაციაში.
უწყების ინფორმაციით, ტელეკომპანია “პირველის” ოპერატორი საქმეზე დღის განმავლობაში გამოიკითხება.
ცნობისთვის, გვიან ღამით, “ტვ. პირველის” ოპერატორი ჩართვის ემზადებოდა, მას რამდენიმე ახალგაზრდა მიუახლოვდა, ჯერ სიტყვიერი, შემდეგ კი ფიზიკური შეურაცხყოფა მიაყენა.
