საქართველოში წმიდა საყდრის ნუნციომ არქიეპისკოპოსმა ჟოზე აველინო ბეტანკურმა თბილისის სამების საკათედრო ტაძრის მგალობელთა გუნდს ვატიკანში ისტორიულ ვიზიტამდე წმიდა საყდრის სადესპანოში უმასპინძლა.

„კეთილი იყოს თქვენი მობრძანება საქართველოში პაპ ფრანცისკეს სახლში - "ვატიკანის ბაღებში" თბილისში, სამოციქულო ნუნციატურაში”, - მიმართა ბეტანკურმა „სამების“ მგალობელთა გუნდს.

ქართულ ტრადიციულ სამოსში გამოწყობილმა წმიდა საყდრის დესპანმა მგალობლებს ვატიკანში სასიამოვნო და უსაფრთხო მოგზაურობა უსურვა.

„თქვენი ვიზიტი ვატიკანში მნიშვნელოვანი და ისტორიული მოვლენაა. მე ძალიან ბედნიერი და მადლიერი ვარ ამისთვის. თქვენ ხართ სრულიად საქართველოს კათოლიკოს პატრიარქის, უწმინდესისა და უნეტარესის ილია მეორის ემისრები. თქვენ ხართ კეთილშობილი ქართველი ერის ელჩები”- აღნიშნა სამოციქულო დესპანმა.

არქიეპისკოპოსის თქმით, სამების საკათედრო ტაძრის მგალობელთა გუნდს ვატიკანში ვიზიტი ისტორიის რთულ პერიოდში უხდება, როდესაც უკრაინაში ომი მძვინვარებს. ბეტანკურის განცხადებით, უკრაინის ტრაგედია ძალიან ახლოსაა საქართველოს გამოცდილებასთან, რამაც უამრავი ადამიანის სიკვდილი და მტკივნეული დევნილობა გამოიწვია.

„თქვენი ვატიკანში ყოფნა და საგალობლები მსოფლიოს იმედის შუქურებია! გმადლობთ!“- დასძინა ვატიკანის ელჩმა.

ვატიკანის საელჩოში აღნიშნულ მიღებას ესწრებოდნენ საქართველოს კულტურის, სპორტისა და ახალგაზრდობის მინისტრი და ვიცე-პრემიერი თეა წულუკიანი, საგარეო საქმეთა მინისტრის მოადგილე ლაშა დარსალია, საქართველოს პრეზიდენტის ადმინისტრაციის უფროსი ნათია სულავა, პროტოპრესვიტერი გიორგი ზვიადაძე, ლათინ კათოლიკეთა კავკასიის სამოციქულო ადმინისტრატორი, ეპისკოპოსი ჯუზეპე პაზოტო და ბიზნესმენი ვანო ჩხარტიშვილი.

შეგახსენებთ, 26 ივნისს სამების საკათედრო ტაძრის მგალობელთა გუნდი კონცერტით სიქსტეს კაპელაში წარდგება, ხოლო 29 ივნისს, წმ. პეტრეს ბაზილიკაში, პაპ ფრანცისკესა და ვატიკანში ვიზიტად მყოფი კონსტანტინოპოლის მსოფლიო საპატრიარქოს დელეგაციის თანდასწრებით, სრულიად საქართველოს კათოლიკოს-პატრიარქ ილია II-ის „ავე მარიას“ შეასრულებს.