დრო ცოტაა დარჩენილი, საბჭოს გადაწყვეტილება 99 პროცენტით თანხვედრაში იქნება ევროკომისიის დასკვნასთან და სამწუხაროდ, ბევრი ვერაფერი გაკეთდება ამ დღეების განმავლობაში,- ასე პასუხობს პარტია "ქართული ოცნების" თავმჯდომარე ირაკლი კობახიძე ჟურნალისტებთან კითხვას, რას გააკეთებს "ქართული ოცნება", რომ დასავლელი ლიდერების ჯოზეფ ბორელის და შარლ მიშელის განწყობა საქართველოს ევროპულ პერსპექტივაზე რეალობად იქცეს.
კობახიძის განცხადებით, ძალიან დაბალი და მიზერულია იმის ალბათობა, რომ კომისიის და საბჭოს გადაწყვეტილება აცდეს ერთმანეთს.
„რაც შეეხება ჩვენს ნაბიჯებს, დრო ცოტაა დარჩენილი და გარდა ამისა, ჩვენ ვთქვით, რომ საბჭოს გადაწყვეტილება 99% თანხვედრაში იქნება იმ დასკვნასთან, რომელიც შეიმუშავა ევროპულმა კომისიამ, აქედან გამომდინარე, სამწუხაროდ, ბევრი ვერაფერიც გაკეთდება ამ დღეების განმავლობაში, თუმცა ჩვენი მხრიდან ძალისხმევა არ იქნება დაშურებული, რომ მაქსიმუმი გაკეთდეს. ამისთვის კომუნიკაციაც შედგება და გაგრძელდება ევროპელ კოლეგებთან. თუმცა დროც ცოტაა დარჩენილი და გარდა ამისა, ძალიან დაბალი და მიზერულია იმის ალბათობა, რომ კომისიის და საბჭოს გადაწყვეტილება აცდეს ერთმანეთს", - განაცხადა კობახიძემ.