თბილისის მერია უსახლკაროს სტატუსის მქონე ოჯახებისთვის ბინების გადაცემას განაგრძობს.

ამის შესახებ დედაქალაქის მერმა, კახა კალაძემ მუნიციპალიტეტის მთავრობის სხდომაზე განაცხადა.

„როგორც იცით, უსახლკაროს სტატუსით დღეს 400 ოჯახი სარგებლობს. მუნიციპალიტეტს ისინი ქირით ჰყავს გაყვანილი. აღნიშნული პრობლემის აღმოსაფხვრელად კონკრეტული ნაბიჯების გადადგმა და ამ ადამიანებისთვის საცხოვრებელი ფართების შეძენა დავიწყეთ. პროგრამის ამოქმედებიდან დღემდე, შესყიდულია, ჯამში, 40 ბინა. ჩვენი დაპირებაა, რომ მომდევნო წლების განმავლობაში, ეს თემა მთლიანად დაიხურება, მუნიციპალური საცხოვრისის გარეშე არც ერთი უსახლკარო თბილისელი არ დარჩება და საცხოვრებელი ფართები ყველას გადაეცემა. ამ მიმართულებით მუშაობას განვაგრძობთ და უსახლკაროს სტატუსის მქონე ყველა ოჯახი იქნება ბინებით დაკმაყოფილებული“, - განაცხადა კახა კალაძემ.

მისივე თქმით, აღნიშნული სტატუსის მისაღებად, მოქალაქეებმა მათსავე რაიონის გამგეობას უნდა მიმართონ, სადაც წარსადგენი დოკუმენტაციის შესახებ დეტალურ ინფორმაციას მიიღებენ.