აი, კიდევ ერთი მტკიცებულება, რომ მახინჯი გოგო არ ვართ - ბევრად უფრო ლამაზები ვართ, ვიდრე უკრაინა და მოლდოვა, - ამის შესახებ „ქართული ოცნების“ თავმჯდომარე ირაკლი კობახიძემ განაცხადა, რითაც უპასუხა კითხვას იმის შესახებ, რომ საქართველო გლობალური მშვიდობის რეიტინგის ინდექსით მეორე ადგილზეა.

როგორც კობახიძემ აღნიშნა, საქართველო ნებისმიერი პარამეტრით მოწინავე ქვეყანაა.

„ნებისმიერი პარამეტრი რომ ავიღოთ, ყველა მიმართულებით ვართ მოწინავე. ზუსტად ჩვენი პოლიტიკის დამსახურებაა, რომ საერთაშორისო დონეზე უსაფრთხოების ხარისხი რადიკალურად გაუმჯობესებულია. გახსოვთ, რა მდგომარეობაში იყო ქვეყანა 2012 წლამდე. განსაკუთრებით 2008-2012 წლებში კატასტროფული მდგომარეობა გვქონდა უსაფრთხოების თვალსაზრისით და ეს მდგომარეობა რადიკალურად შეიცვალა 2012 წლის შემდეგ, როდესაც „ქართული ოცნება“ საქმეს განსხვავებული პოლიტიკით მიუდგა და ასეთი რეიტინგებიც ამ პოლიტიკის დამსახურებაა“,- განაცხადა ირაკლი კობახიძემ.