კაცი გირგვლიანის ადვოკატი იყო და დღეს „ნაცებშია“ - როგორ მოგწონთ?! ესაა შალვა შავგულიძე, გაიცანით, - ამის შესახებ საქართველოს პრემიერ-მინისტრმა ირაკლი ღარიბაშვილმა პარლამენტის პლენარულ სხდომაზე განაცხადა, სადაც დეპუტატების კითხვებს პასუხობს.

პრემიერმა შავგულიძეს მიმართა, შეცდომებზე თავად იფიქროს, რადგან „ქართულ ოცნებას“ ამაზე უკვე ნაფიქრი აქვს.

„რა შეცდომებიც დაუშვა, ამაზე იფიქროს თვითონ, როცა მარტო დარჩება. კაცი გირგვლიანის ადვოკატი იყო და დღეს „ნაცებშია“ - როგორ მოგწონთ?! ესაა შალვა შავგულიძე, გაიცანით და მე მეკითხება, რა შეცდომები დაუშვით, რომ ამაზე იფიქროთ, რომ გამოასწოროთო. თქვენ იფიქრეთ ბატონო შალვა, თქვენ, თორემ ჩვენ ნაფიქრი გვაქვს“,- განაცხადა ირაკლი ღარიბაშვილმა.

ცნობისთვის, პლენარულ სხდომაზე ოპოზიციონერმა დეპუტატმა შალვა შავგულიძემ პრემიერს საკუთარი განცხადებები შეახსენა, რომელიც, დეპუტატის თქმით, საქართველოს ევროკავშირში ინტეგრირებას ხელს უშლის. მისი თქმით, პასუხისმგებლობა ქვეყნის წარმატებაზეც და წარუმატებლობაზეც ხელისუფლებას ეკისრება.