საქართველოს ფუტსალის უმაღლესი ლიგის 2021-2022 სეზონის ჩემპიონატი „თელასი ჯორჯიანსის” გამარჯვებით დასრულდა. ინფორმაციას ამის შესახებ „თელასი“ ავრცელებს.

მათივე ცნობით, „თელასი ჯორჯიანსის” ფეხბურთელები ჩემპიონატის გამარჯვებულები უკვე მეოთხედ გახდნენ და უეფას ჩემპიონთა ლიგის საკვალიფიკაციო ეტაპზე გავიდნენ.

ამასთან ერთად, პირველად საქართველოს ეროვნული ჩემპიონატის ისტორიაში, ჩემპიონის ტიტულთან ერთად, „თელასი ჯორჯიანსი” ფუტსალის თასის მფლობელიც გახდა. გუნდის წევრებმა ჩემპიონატის რამდენიმე ნომინაციაშიც გაიმარჯვეს: საუკეთესო მცველი - შოთა თოფურია, საუკეთესო თავდამსხმელი - დავით ხეჩიკაშვილი, საუკეთესო მოთამაშე - ვახტანგ კეკელია.

„საქართველოს ფუტსალის უმაღლესი ლიგის ჩემპიონატი 23 ივნისს დასრულდა. ფინალში „თელასი ჯორჯიანსის” ფეხბურთელებმა ანგარიშით 2:1 გუნდი „კავკასიის საერთაშორისო უნივერსიტეტი“ დაამარცხეს.

ჩემპიონატი ორ ეტაპად ჩატარდა და მასში ქვეყნის სხვადასხვა რეგიონიდან 10 გუნდი მონაწილეობდა.

საქართველოს ფუტსალის უმაღლესი ლიგის ჩემპიონატის გამარჯვებული ავტომატურად უეფას ჩემპიონთა ლიგის საკვალიფიკაციო ეტაპზე ხვდება. ივლისის დასაწყისში უეფა კენჭისყრას ჩაატარებს, სადაც „თელასი ჯორჯიანსის” სავარაუდო მეტოქე გაირკვევა,“ - აღნიშნულია ინფორმაციაში.