თბილისის საკრებულოს თავმჯდომარე გიორგი ტყემალაძე, საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარე, ლევან ჟორჟოლიანი და საკრებულოს ფრაქციის “ქართული ოცნება-დემოკრატიული საქართველო" თავმჯდომარე, ოთარ გრიგოლია 30 ივნისს, სტამბოლში, ევროპის საბჭოს ადგილობრივ და რეგიონულ ხელისუფლებათა კონგრესის მონიტორინგის კომიტეტის შეხვედრაში მონაწილეობას მიიღებენ. ინფორმაციას ამის შესახებ თბილისის საკრებულო ავრცელებს.

მათივე ცნობით, მონიტორინგის კომიტეტის შეხვედრაზე ბელგიაში, შვედეთსა და დანიაში ადგილობრივი თვითმმართველობის ევროპული ქარტიის შესრულების შესახებ ანგარიშებს განიხილავენ, ასევე, შეხვედრის მონაწილეები ანგარიშებს ალბანეთში, ნიდერლანდებში და სერბეთში ჩატარებული ადგილობრივი თვითმმართველობის არჩევნების მონიტორინგის შესახებ მოისმენენ.

გარდა ამისა, შეხვედრაზე გარემოსდაცვის ჭრილში ადამიანის უფლებების შესახებ მოხსენებას წარადგენენ, სადაც თანამომხსენებელია თბილისის საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარე, ლევან ჟორჟოლიანი.