პოლიტიკური „ტრიუკები“ ჩვენ არ გვჩვევია - პოლიტიკურ „ტრიუკებზე“ ისინი ლაპარაკობენ, ვისაც ეს სჩვევია და ვისთვისაც წარმოუდგენელია, რომ კონსპირაციების გარეშე არაფერი ხდება, - ეს განცხადება „ქართული ოცნების“ ერთ-ერთმა ლიდერმა გია ვოლსკიმ მმართველი გუნდის შემადგენლობიდან სამი დეპუტატის გასვლის თაობაზე დასმული კითხვის პასუხად გააკეთა.
ვოლსკის თქმით, მათთვის, ვინც პოლიტიკურ „ტრიუკზე“ საუბრობს, ზნეობრივი პოლიტიკა წარმოუდგენელია.
„სამი ადამიანი უმრავლესობიდან წავიდა. მათ თანამდებობები დატოვეს იმისთვის, რომ გარკვეულ საკითხებზე ვერ შევთანხმდით. არ მიმაჩნია, რომ შიდა პოლიტიკური სამზარეულოს თემები გარეთ უნდა გამოვიტანოთ. რაც საჭიროა და რაც მნიშვნელოვანია, საჯაროდ საუბრისგან თავი არ შეგვიკავებია. არ მგონია, რომ „ნაცმოძრაობას" დაეჯერება, როცა პოლიტიკაში „ტრიუკებსა“ და უზნეობაზე ლაპარაკობენ. ამის იქეთ საკითხზე კომენტარს არ ვაკეთებ“, - განაცხადა გია ვოლსკიმ.