როგორც ჩანს, ქუჩაში აქციების შემდგომ საპარლამენტო ოპოზიციას რეგლამენტის ჩანაწერები გადაავიწყდა - ის საკითხები, რაზეც რიგგარეშე სესია უნდათ მოიწვიონ, ჯერ კომიტეტზეა გასატანი, - ამის შესახებ ჟურნალისტებთან საპარლამენტო უმრავლესობის წევრმა, გურამ მაჭარაშვილმა განაცხადა, რითაც რიგგარეშე სხდომის მოწვევის თაობაზე ოპოზიციის ინიციატივას გამოეხმაურა.

მაჭარაშვილის თქმით, საკონსტიტუციო ცვლილებები იქნება თუ სხვა საკითხები, ოპოზიციას შეუძლია სამუშაო ჯგუფის ან კომიტეტის ფორმატში დააყენოს, რომელიც უკვე ჩანიშნულია.

„მათ კარგად უნდა იცოდნენ, პარლამენტის წევრს არ სჭირდება არანაირი მიპატიჟება კომიტეტის სხდომაზე და სამუშაო ჯგუფებში, მეტიც, შეუძლია ალტერნატიული წინადადებებიც დააყენოს. ნებისმიერი საკითხი, ეს იქნება საკონსტიტუციო ცვლილებებზე, თუ განსაკუთრებით იმ საკითხებზე, რაც არის 12- პუნქტიან გეგმაში, ჩვენ ვართ მზად, უნდა მობრძანდნენ სამუშაო ჯგუფის თუ კომიტეტის ფორმატში და დააყენონ თავიანთი საკითხები.

იმდენად გაზარმაცდნენ, სამუშაო ჯგუფებში და პარლამენტში სიარული აღარ უნდათ, თუ სესია არ ჩატარდა. სესიების შორის პერიოდში საპარლამენტო არდადეგები რომ ცხადდება, ეს პირადი არდადეგები არ არის, უნდა მოვიდნენ, იმუშაონ, ის საკითხები, რაზეც საუბრობენ და უნდათ მოიწვიონ რიგგარეშე სესია, ჯერ კომიტეტზეა გასატანი, ამათ რატომღაც წარმოუდგენიათ, რომ ქუჩიდან კანონპროექტი პირდაპირ სესიაზე შედის, ეს ასე არ არის. ბევრი ეტაპია, სანამ სესიაზე გავა კანონპროექტი, საპარლამენტო ოპოზიციამ ეს კარგად უნდა იცოდეს, რომ როცა სამუშაო პროცესში დაანახებ საზოგადოებას, რომ მზად ხარ, ამის შემდეგ შეიძლება იზრუნო სესიაზე", - განაცხადა მაჭარაშვილმა.